Opreti sakini Maia Çaçava ictimai nəqliyyat olmadığına görə üçüncü
həftədir, günəbaxan yağı, şəkər, un, çörək və gigiyenik vasitələr
ala bilmir.
Kəndin yeganə avtobusu sıradan çıxıb və yerli sakinlər evdən çıxa
bilmir.
Sərhədyanı kənd Marneuli şəhərindən 55 kilometr məsafədə
yerləşir.
Orada yaşayan 50-yə yaxın sakin üçün həftənin üç günü Marneuliyə
gəlmək imkanı var idi. Çərşənbə axşamı, çərşənbə və bazar günü
avtobus dolurdu, əhali Sadaxlının mərkəzində və ya Marneulidə qida
məhsulları alırdı, həkimə gedirdi, banka gedir və ya başqa
işlərinin arxasınca qaçırdı ki, həmin marşrutla geri qayıda bilsin.
İndi isə şəhərə getmək üçün yeganə vasitə özəl nəqliyyat və ya
taksidir.
“Nə edim, ərzaq almalıyam, taksi pulumuz yoxdur. Təqaüd və sosial
yardımdan asılıyam. Taksiyə 60 lari lazımdır. Fiziki imkanları
məhdud olan uşağım var, bez yoxdur, getmək üçün imkanım da yoxdur.
Yeganə çıxış yolu odur ki, yoldaşım səhər saat 6-da piyada getsin,
əgər bəxti gətirsə, yolda kimsə rast olacaq. Burada heç nə yoxdur,
nə mağaza, nə xəstəxana, elementar əczaxana da yoxdur. İndi
axırıncı unu yoğurmuşam ki, çörək bişirim”.
Kəndin digər sakinləri də Maianın vəziyyətinə düşüblər. Əhali deyir
ki, nəqliyyatın olmaması problemləri daha da ağırlaşdırıb. Bəzən
kəndə ərzaq maşını gəlir. Hər şeyin qiyməti ikiqat artıq olur və
əksər hallarda ala bilmirlər.
“Hər şeydən məhrumuq. Yeganə nəqliyyat idi ki, şəhərlə bizi
əlaqələndirirdi və ərzaq almaq üçün gedirdik. Elementar olaraq,
əhaliyə çörək lazımdır. Qocalar var, tək yaşayırlar. Nəqliyyat
baxımından çox çətinlik çəkirik. Yolu heç demirəm, təmir edirlər.
Nəqliyyat onsuz da bir dənə idi, kim çatdırsa, o, minirdi.
Marneulidən saat 3-də çıxırdı, hər şeyi çatdırmalı idik. Kənddə
əhalinin məskunlaşmasını istəyirlərsə, elementar şərait
yaratmalıdırlar”, – Opreti sakini Maia Mikiaşvili
bildirdi.
Opreti kimi, qonşu kəndlərə – Çanaxçı və Ağkörpüyə də nəqliyyat
işləmir. Marneuli meriyasının balansında olan nəqliyyat şirkətinin
rəhbəri Qiqa Calağonianın əhaliyə nə alternativ yolu, nə də
ümidverici cavabı var. O, “Marneuli” radiosu ilə söhbəti zamanı
bildirdi ki, Opreti, Çanaxçı və Ağkörpü kəndlərinin relyefi
çətindir. Buna görə də hər nəqliyyatı oraya göndərə bilmirlər. Qeyd
olunan marşrut xəttində hərəkət edən yeganə avtobusun təmirini isə
hissələrin tapılmamasına görə, edə bilmirlər.
Problemlərdən əlavə, əhali deyir ki, xəstələnməkdən qorxurlar.
Bunun səbəbi çoxdur. Yol o dərəcədə sıradan çıxıb ki, təcili yardım
çağırılanda kəndə çox gec gəlib çıxırlar, əksər hallarda isə
gəlmirlər. Opretinin ambulatoriyası var, ailə həkimləri də var,
ancaq əhalinin dediyinə görə, uzun zamandır heç kim orada həkim
görməyib və ambulatoriyanın qapısı da nadir hallarda açılır.