Gürcüstan Maliyyə Nazirliyinin İstintaq Xidmətinin əməkdaşları Acarıstan və Quriya bölgələrində qanunsuz fəaliyyət göstərən 22 valyutadəyişmə məntəqəsi aşkarlayıblar.

İstintaqla müəyyən edilib ki, sözügedən məntəqələr qanunvericiliyin tələblərinə uyğun olmayan şəraitdə qurulub və Gürcüstan Milli Bankının icazəsi olmadan fəaliyyət göstərib.

Genişmiqyaslı tədbirlər çərçivəsində, məhkəmə qərarı əsasında eyni vaxtda 22 ünvanda axtarış aparılıb. Hüquq-mühafizə orqanlarının əməkdaşları xüsusilə külli miqdarda Gürcüstan və xarici valyuta, kompüter avadanlıqları və konvertasiya üçün zəruri olan inventarlar müsadirə ediblər. Müsadirə edilən valyutanın ümumi dəyəri 500 000 laridən çoxdur.

Hazırda cinayətdə iştirakı olan şəxslərin müəyyən edilməsi məqsədilə intensiv istintaq tədbirləri davam etdirilir.

Cinayət işi Gürcüstan Cinayət Məcəlləsinin 192-ci maddəsinin ikinci hissəsinin "a" bəndi ilə (qanunsuz sahibkarlıq fəaliyyəti) aparılır. Bu maddə cəza növü olaraq 3 ildən 5 ilədək müddətə azadlıqdan məhrumetməni nəzərdə tutur.