Rusiya yanvarın 26-dan etibarən buğdanın ixrac vergisini 1,7 dollar
azaldacaq. Müvafiq olaraq, buğdanın ton başına ixrac vergisi 97,5
əvəzinə 95,8 dollar olacaq. Məlumatı Rusiya Kənd Təsərrüfatı
Nazirliyinə əsaslanan Rusiya nəşrləri yayıb.
Qeyd edək ki, ixrac vergisinin azaldılması artıq iki həftədir ki,
davam edir. Rusiya ötən ilin sentyabrından bəri ilk dəfə olaraq
keçən həftə buğda tarifini aşağı salıb.
Eyni zamanda, arpa üçün gömrük rüsumu 79 dollardan 74,4 dollara
endiriləcək, qarğıdalı üçün isə 46,1 dollardan 50,6 dollara
qaldırılacaq. Sözügedən vergi fevralın 1-dək qüvvədə olacaq.
İxrac vergisi taxılın indikativ qiymətlərinə əsaslanır ki, bu da
bir ton buğda üçün 336,9 dollar (bir həftə əvvəl 339,3 dollar),
arpa üçün 291,3 dollar (bir həftə əvvəl 297,9 dollar) və qarğıdalı
üçün 257,4 dollar (bir həftə əvvəl 250,9 dollar) təşkil edir.
Məlumat üçün: Rusiya ötən il iyunun 2-dən taxıl ixracına üzən vergi
tətbiq edib və bu vergi Moskva birjasında taxılın qiyməti əsasında
həftəlik əsasda müəyyən edilir.
Rusiya Kənd Təsərrüfatı Nazirliyinin proqnozuna görə, 2021-2022-ci
kənd təsərrüfatı ili üçün taxıl ixracı 45-48 milyon ton təşkil
edəcək. Ötən il bu rəqəm 49 milyon ton olub ki, bunun da 38,4
milyon tonu buğda olub.
Gürcüstanın həm buğda, həm də un üçün əsas idxal bazarı Rusiyadır.
Ötən il Gürcüstana 93,4 milyon dollara 366 min 766 ton buğda ixrac
edilib ki, bunun da 337 min 694 tonu Rusiya buğdasının payına düşüb
(87,4 milyon dollar).