Gürcüstan hökuməti 0.25-dən 1.25 hektara qədər kənd təsərrüfatı
təyinatlı torpaq sahəsi sahibləri üçün subsidiya proqramına
başlayıb.
Gürcüstan hökuməti tərəfindən yayımlanmış rəsmi məlumata görə, kənd
təsərrüfatı təyinatlı torpaqlar üçün subsidiya proqramı ilə 1
hektara 300 lari nəzərdə tutulub. Kəndlərin İnkişafı Agentliyindən
“Marneuli” radiosuna bildirdilər ki, fermerlər torpaq sahələrinə
uyğun olaraq subsidiya alacaqlar.
Misal üçün, əgər fermerin 0.25 hektar kənd təsərrüfatı təyinatlı
torpağı varsa o, 75 lari, yarım hektar torpağı olan halda isə 150
lari subsidiya alacaq.
Marneulili fermer Ömar Məmmədov “Marneuli” radiosu ilə söhbəti
zamanı bildirdi ki, fermerlərə bir hektar torpaq sahəsində hər
hansı bitkini becərmək üçün minimum 1000 lari lazım olur. O, hesab
edir ki, dövlət subsidiya dərmanlar almağa qismən kömək edəcək.
Ancaq qeyd edir ki, bu yardım fermerlər üçün yenə də yetərli
deyil.
“Mən şəxsən indi torpaqda yonca əkmişəm. Yoncaya dərman lazımdır,
həm də ən azı üç dəfə dərman vurmalısan, güman ki, bu pulla dərman
ala bilərəm, dərmanlayaram. Ancaq bu bir dəfə kifayət edəcək.
Ümumiyyətlə, 300 lari şumlamağa və səpinə kifayət etmir. Bir
hekatarı şumlamaq üçün 350 lari lazımdır. İndi mən torpağı şumlayıb
yenidən yonca və ya buğda əksəm, bu pul heç nəyə yetməyəcək.
Əlbəttə, bu pul bizə kömək edir, ancaq elə də çox
deyil”, – Ömar Məmmədov bildirdi.
Gürcüstan hökumətinin bildirdiyinə görə, subsidiya proqramından 300
000-ə yaxın fermer faydalanacaq. Büdcə isə 35 milyon lari təşkil
edir. Kəndlərin İnkişafı Agentliyindən “Marneuli” radiosuna
bildirdilər ki, fermerlər köçürülmüş balları Qida Təhlükəsizliyi
Agentliyi tərəfindən tanınmış biznes opratorlarda, əsasən kənd
təsərrüfatı təyinatlı texnika və dərmanlar satılan mağazalarda
xərcləyə biləcəklər. Fermerlərin qeyd olunan mağazalarda balı tam
xərcləmək və kənd təssrüüfatı təyinatlı texnika və ya dərman almaq
hüququ var.
Fermerlər proqramda iştirak etmək üçün fermerlər reyestrində
qeydiyyatdan keçməlidirlər. Ötən illərdə də dövlət subsidiyası alan
fermerlərə təkrar qeydiyyatdan keçmək lazım deyil. Ancaq reyestrdə
hələ də qeydiyyatdan keçməyənlər Kəndlərin İnkişafı Agentliyinin
qaynar xəttinə, 1501 nömrəsinə zəng vurmaqla qeydiyyatdan keçə
bilərlər.
Kəndlərin İnkişafı Agentliyindən bildirdilər ki, fermerlərə pul
"Liberty Bank" hesabına köçürüləcək. Pulu yaxın gələcəkdə əldə edə
biləcəklər. Proqram isə 2022-ci ilin 30 noyabrına qədər davam
edəcək.