Gürcüstan Daxili İşlər Nazirliyi Marneulidə yetkinlik yaşına
çatmamış qızın nişanlandırılması faktı ilə bağlı isintaqa başlayıb.
Qurumdan “Marneuli” radiosuna verilən məlumata görə, isintaq
məcburi evləndirmə faktı ilə əlaqədar aparılır.
Yetkinlik yaşına çatmamış qızın nişanlandırılması faktını Xalq
Müdafiəçisi Aparatı artıq araşdırır. 15 yaşlı qızla psixoloq da
işləyəcək. Marneuli Zorakılıq Qurbanlarına Xidmət Böhran Mərkəzinin
rəhbəri Eka Bedianaşvilinin “Marneuli” radiosuna bildirdiyinə görə,
qəyyumluq və qayğı göstərmə orqanının sosial işçiləri fakt
yayıldıqdan sonra təcili surətdə iş prosesinə qoşuldular.
“Söhbət məcburi şəkildə nişanlandırılmadan gedir. Sonra
aydın oldu ki, bu uşaq məcbur edildiyini təsdiqləmir. Böhran
Mərkəzinin xidmətinə gəldikdə isə, qeyd edim ki, Sosial Xidmət
Agentliyinin Qəyyumluq və Qayğı Göstərmə Orqanının nümayəndələri
bizə müraciət edəcəklər. Bundan sonra bizim əməkdaşlar, psixoloq
prosesə qoşulacaq. Mənə deyilənə görə, Qəyyumluq və Qayğı Göstərmə
Orqanından yaxın zamanda bizə müraciət edəcəklər. Ola bilsin, bu
gün də məktub göndərsinlər, onların müraciətindən sonra psixoloq
qızla işləyəcək”.
Marneuli şəhərində 15 yaşlı qızın nişanlandırılması barədə məlumatı
“Marneuli” radiosuna gizli mənbədən vermişdilər. 27 aprel tarixində
ailənin yaxını gizliliyinin qorunması şərti ilə “Marneuli”
radiosuna bildirmişdi ki, yeniyetməni özündən təqribən 10 yaş böyük
kişiyə nişanlayıblar. Ailənin yaxını bildirmişdi ki, yeniyetməni
atalığı artıq ikinci dəfədir ki, məcburi şəkildə nişanlayıb.
Yetkinlik yaşına çatmamış şəxsin birinci dəfə evləndirilməyə cəhd
edilməsi zamanı atalığa mane olublar. İkinci dəfə isə nişan gizli
keçirilib ki, məsələni qonşu və qohumlardan gizləsinlər.