Marneuli bələdiyyəsinin Axlılələ kəndində yerli çiyələyin ilk
məhsulunu yığırlar.
Rzayevlər ailəsi çiyələk becərməyi illərdir gəlir mənbəyinə
çevirib. Giləmeyvənin yığılmasında bütün ailə iştirak edir.
Səkinə Rzayeva deyir ki, ötən illə müqayisədə məhsul azdır. Ailə
bioloji baxımdan təmiz məhsul yetişdirir və kənddə, yaxud şəhərdən
kənarda satırlar. 1 kiloqram çiyələyin dəyəri 3,50 laridir.
“Məhsulun yığılması prosesinə bütün ailə qoşulur. Anam,
atam, bəzən bacım da mənə kömək edirlər. Babam və nənəm öz
bağlarında işləyirlər. Atam əsasən satışla məşğul olur. Biz
yığırıq, onlar Batumidə, Tbilisidə satırlar. Harada yaxşı
satılırsa, orada satırlar. Bu il məhsuldarlıq yaxşı deyil, keçən il
daha yaxşı idi”.
Ailənin ən yaşlı üzvü, Ələşrəf Rzayev qorxur ki, bu ilki çiyələklə
bankdan götürdüyü krediti ödəyə bilməyəcək. O, qeyd edir ki, ötən
illərdə məhsul daha çox idi və gəlirdən də şikayət etmirdilər.
Ələşrəf Rzayevin sözlərinə görə, onların problemi su
çatışmazlığıdır. Buna görə də məhsulu tez-tez suvara
bilmirlər.
“Təxminən 20 ildir ki, çiyələk, kartof əkirik. Kartof çıxan
kimi çıxarıb satırıq. Bu il kredit faizlərini ödəməkdə çətinlik
çəkəcəyəm. Başqa gəlirim yoxdur. Ailədə heç kim işləmir. Nə həyat
yoldaşım, nə gəlinim. Bu il məhsul çox pisdir. 1-2 minlik götürə
bilsək, yaxşıdır, heç onu da bilmirəm. Nə yalan deyim, bu il
məhsuldarlıq çox pisdir. Əvvəl daha çox məhsul olurdu. Gəlir də
yaxşı idi. Kiçik bir problemimiz var. Su yoxdur. Evdə istixanam var
və suvara bilmirəm, suyumuz yoxdur. Bir aydır, su gəlmir. Müraciət
edəndə deyirlər ki, borular sıradan çıxıb və ya başqa nə isə xarab
olub”.
Çiyələyin qiyməti dəyişir. Məsələn, 1 kiloqramın dəyəri 18 may
tarixində 4,50 lari idi, 19 may tarixində isə 3.50 laridir.