Şovidə təbii fəlakət zonasında 18 yaşlı Samirə İsayevanın cəsədi tapılıb. Bu barədə məlumatı “İnfo Rustavi”yə Samirənin qardaşı verib. Mərhumun qardaşının sözlərinə görə, gənc qızın cəsədini bu gün səhər saatlarında atası tanıyıb.

Samirə İsayeva iyulun 25-dən qonşuları ilə istirahət üçün Şoviyə yollanıb. Ailə ilə son təmas avqustun 2-də olub.

“Biz sonuncu dəfə avqustun 2-də danışmışıq. Mamisonidə kotteclər icarəyə götürmüşdülər, mən onlarla videokamera vasitəsilə danışırdım və o, mənə dedi ki, ətrafı göstərirər, biz burada qalırıq. İki həftəlik getmişdilər, sonra Batumiyə getməyə hazırlaşırdılar.

Avqustun 2-dən sonra isə artıq əlaqə saxlaya bilmirik.Qonşularım bacımın yanında idi. Ümumilikdə 4 nəfər getdi və heç biri ilə əlaqə saxlaya bilmirik”, - deyə Samirənin qardaşı İsgəndər İsayev “Batumelebiyə” danışarkən bildirmişdi.

Raçada, Şovidə, fəlakət zonasında dördüncü gündür xilasetmə əməliyyatları davam edir. Avqustun 3-də Şovidə baş verən torpaq sürüşməsi insan tələfatı ilə nəticələnib, təbii fəlakət zonasında insanların axtarışları hələ də davam edir.

Son məlumatlara görə, təbii fəlakət nəticəsində 18 nəfər həyatını itirib. Əldə olan məlumata görə, ölənlər arasında Davit Beriaşvili, Qiorqi Qoqinaşvili, Ukrayna vətəndaşı Alina Polikovskasiya və Rusiya vətəndaşı Kseniya Triçeva da var. Fövqəladə Hallar İdarəsi xidmətinin məlumatına görə, xilasedicilər daha 17 nəfəri axtarır. İtkin düşənlər arasında kiçik uşaqlar da var.