Daxili İşlər Nazirliyi (DİN) 15 iyulda Qori bələdiyyəsinin Xeltubani kəndində baş vermiş insidentlə bağlı bəyanat yayıb.

DİN-in məlumatına görə, daxili işlər nazirliyinin əməkdaşları xidməti vəzifələrini yerinə yetirərkən bir neçə vətəndaş tərəfindən fiziki hücuma məruz qalıb. Şida Kartli polis departamentinin əməkdaşlarına müxtəlif dərəcəli bədən xəsarətləri yetirilib, üç polis soyuq silahla yaralanıb və onların hamısı xəstəxanaya yerləşdirilib.

Nazirliyin açıqlamasında bildirilir ki, hüquq-mühafizə orqanlarının əməkdaşları xidməti vəzifələrini yerinə yetirərkən bir avtomobili yoxlamaq üçün saxlayıblar. Məlum olub ki, avtomobili sürücülük hüququ olmayan yetkinlik yaşına çatmayan şəxs idarə edib və polisə müqavimət göstərib:
“Daha sonra mübahisəyə yetkinlik yaşına çatmayan şəxsin atası və onların qohumları da qarışıb. Nəticədə, yetkinlik yaşına çatmayan və onu müşayiət edən şəxslər hüquq-mühafizə orqanlarının əməkdaşlarına xəsarət yetiriblər.”

Polis əməkdaşına qarşı qrup halında hücum ittihamı ilə 5 nəfər, o cümlədən 16 yaşlı yeniyetmə saxlanılıb.

Faktla bağlı istintaq Gürcüstan Cinayət Məcəlləsinin 353-cü prima maddəsinin ikinci hissəsi ilə aparılır. Bu maddə 4 ildən 7 ilədək azadlıqdan məhrumetməni nəzərdə tutur.