Marneulidə qəbristanlığa yeni zibil qutuları
yerləşdirilib. Bu barədə “Gürcü Arzusu”nun fəalı Adil Əliyev 15 may
tarixində şəxsi “Facebook” profilində paylaşım
etmişdi.
O,
həmin paylaşımda “Gürcü Arzusu”nun Marneuli merliyinə namizədi Zaur
Darğallıya Sarvan qəbirstanlığına qoyulan zibil qutuları üçün
Sarvanlılar adından təşəkkür edirdi.
“Biz Sarvanlılar olaraq xahiş etdik ki, bəlkə sən də
xahiş edəsən, qəbiristanlığa zibil qutuları qoyalar. Çünki
qəbiristanlığımızda zibillə bağlı ciddi problemlər var. O, da dedi
ki, xahiş edərəm. Artıq qalsa, yerləşdirərlər. Zaura da buna görə
təşəkkür etdim”, – Adil Əliyev bildirdi.
“Marneuli” radiosu zibil qutularının qoyulmasında Darğallının bir
rolunun olub-olmaması ilə maraqlandı.
Məsələyə aydınlıq gətirmək üçün Zaur Darğallı ilə əlaqə saxladıq.
Darğallı isə məsələ ilə bağlı məlumatının olmadığını bildirdi. Onun
sözlərinə görə, zibil qutuları meriya tərəfindən bütün kəndlərə
qoyulur. Sosial şəbəkədən onun ünvanına yazılan təşəkkürə gəldikdə
isə Darğallı bununla bağlı heç bir fikrinin olmadığı dedi.
"Zibil qutuları meriya tərəfindən paylanıb, hara lazım
idisə, hər yerə paylanıb", - deyə Zaur Darğallı
bildirdi.
Sarvanlıların qəbiristanlığa zibil qutularının qoyulması ilə bağlı
seçkiöncəsi arzusu "Təmiz Marneuli" MMC tərəfindən zibil
qutularının paylanılması ilə üst-üstə düşüb. Qeyd edək ki, meriya
artıq tender vasitəsilə 112 ədəd zibil qutusu alıb və bu qutular
kəndlərə mərhələli şəkildə yerləşdirəcək.