"Parlamentin komitə iclasında milli və dini bayramların rəsmi tətil olunması təklif olundu" - Mirtağı Əsədov
"Parlamentin komitə iclasında
milli və dini bayramların rəsmi tətil olunması təklif
olundu" - bu barədə "Marneuli" radiosu ilə söhbəti
zamanı Ümum Gürcüstan Müsəlmanlar Ali Dini İdarəsinin sədri və
şeyxi Mirtağı Əsədov dedi.
Onun sözlərinə görə, 16 may tarixində Gürcüstan Parlamentində
keçirilən dini məsələlər üzrə işçi qrupun görüşü zamanı Ümum
Gürcüstan Müsəlmanlar Ali Dini İdarəsi tərəfindən bu cür təkliflə
çıxış ediblər.
Əsədov bildirdi ki, Novruz bayramı, Qurban, Ramazan, Məbəs
(peyğəmbərliyə çatma), Qədri-Xum bayramları rəsmi tətil elan
edilməsini və eləcə də Cümə gününün Müsəlmanlar üçün müqəddəs gün
olduğu üçün rəsmi qurumlarda işləyən müsəlmanlar nəzərə alınmasını
təklif ediblər.
Əsədov onu da əlavə etdi ki, "Gürcüstan Müsəlmanları İdarəsi"
tərəfindən səsləndirilən dini məkanların tikilişi üçün aidiyyəti
orqanlara müraciət olunması və oradan verilən mənfi cavablar, eləcə
də dini məkanların tikintisi zamanı xüsusi tənzimləyici qanuna
ehtiyac olması təkliflərini müsbət dəyərləndirirlər.
Onu da qeyd edək ki, işçi qrupun görüşündə Dini Məsələlər üzrə
Dövlət Agentliyinin sədri Zaza Vaşakmadze, müxtəlif dini icmalar,
QHT və hüquqların qorunması sahəsində fəaliyyət göstərən
təşkilatların nümayəndələri iştirak ediblər.