Uzun bir fasilədən sonra "Zarafat kolleksiyası" qayıdır
Tiflis Dövlət Azərbaycan Dram Teatrının aktyoru
və rejissor Anar Rafiqoğlunun “Stand up” komediyası
qayıdır.
Xeyriyyə məqsədi ilə baş tutacaq Stand up komediyasının noyabr
ayında tamaşaçılara təqdimatı planlaşdırılır. “Marneuli” radiosu
ilə müsahibəsi zamanı Tiflis Dövlət Azərbaycan Dram Teatrının
aktyoru və rejissoru Anar Rafioğlunun sözlərinə görə, tamaşa noyabr
ayına təsadüf edəcək və Tbilisidə “Xorova” teatrında baş tutacaq.
Aktyor həmçinin qeyd etdi ki. Stand up komediyasında daha çox
cəmiyyətin marağını çəkəcək mövzular və tənqidi zarafatlar yer
alacaq.
“Biz bu səfər böyük bir zal planlaşdırmışıq. Hər dəfə
Zarafat kolleksiyamız Atoneli teatrında keçirilirdi. O da 90-100
nəfər tutur. Amma bu səfər Xorova teatrını seçmişik 350 nəfər üçün
nəzərdə tutulub. Bu səfər böyük tamaşa göstərəcəyik. Bu səfər daha
çox tənqidi zarafatlar olacaq sosial və qlobal mesajlar verəcəyik.
Sadəcə insanlar gülüb getməyəcəklər və eyni zamanda mənalı mesajlar
eşidəcəklər”, - deyə Rafiqoğlu bildirdi.
Aktyorun sözlərinə görə, “Era” teatrında tamaşalara daha çox zaman
ayırdığına görə son zamanlar “Stand up” komediyasına fasilə verməli
olub. Bu müddət ərzində isə tamaşaçılar tərəfindən Stand up-a
tələbat çox olub.
“Təxminən 2015-ci ildən Zarafat kolleksiyası adı ilə
fəaliyyət göstəririk. Stand up-a fasilə verdikdən sonra tamaşaçılar
düşünürdülər ki, biz adımızı dəyişdirəcəyik, amma son bir dəfə yenə
Zarafat kolleksiyası olaraq tamaşa göstərəcəyik. Bu o demək deyil
ki, son Stand up komediyası olacaq xeyr, sadəcə 4 ildən sonra
gələcək üçün adımızı dəyişməyi düşünürük”, - Anar
Rafiqoğlu dedi.
Rafiqoğlu bildirdi ki, “Stand up” komediyası bu il xeyriyyə məqsədi
ilə keçiriləcək. O, deyir ki, bilet satışı zamanı əldə olunan
məbləğ Gürcüstanın dövlət universitetlərində təhsil alan bir neçə
tələbənin hər hansı ehtiyacını qarşılamaq üçün sərf olunacaq.
“Tamaşamız xeyriyyə status da daşıyacaq. Bu tamaşada siyasətçilər
də yer alacaq. Düşünürəm ki, siyasətçilər daha çox bilet alaraq
tələbələrə az da olsa kömək edə bilərlər. Biz sadəcə çalışacağıq
ki, tələbələr dəstək olaq”, - aktyor qeyd etdi.
A.Rafiqoğlu əlavə etdi ki, Stand up komediyasının baş tutacağı
tarix rəsmi olaraq təsdiqləndikdə bu haqda tamaşaçılara məlumat
verəcəklər.