Marneulili fəal dayısının evində aparılmış axtarışı “Gürcü Arzusu”nun təzyiqi kimi dəyərləndirir
“Ədalətli Seçkilər”
qeyri hökumət təşkilatının Marneuli koordinatoru və mülki fəal
Rəşan Ziyadəliyev 5 dekabr tarixində dayısının evində aparılan
axtarışı iqtidar partiyası tərəfindən onun
qorxudulması
və dayısının siyasi
fəaliyyətə cəlb olunması cəhdi kimi qiymətləndirir.
Ziyadəliyevin dayısı İsmayıl Çobanov Marneulidə nüfuzlu
şəxslərdəndir. Rəşanın sözlərinə görə, demək olar ki, Marneulinin
bütün kəndlərində onun tanışları var.
“Aparılan axtarışdan sonra “başqa şəxslər” ona –
2020-ci il seçkilərində “Gürcü Arzusu”na kömək et, əks halda nə
bilirsən nə olacaq – deyiblər”, – Rəşan Ziyadəliyev
deyir.
Hüquq mühafizə orqanları Çobanovun evində 5 dekabr 2019-cu il
tarixində axtarış aparıblar, buna səbəb olaraq isə “112”-yə zəng
daxil olmasını bildiriblər. Zəng vuranlar Çobanovun ailəsində odlu
silahdan açılmış atəş səsini eşitdiklərini deyiblər.
“Polislər evə daxil olduqda ailə üzvlərinə icazə kağızını (məhkəmə
hökmü) göstəriblər, lakin ailə üzvləri gürcü dilini bilmirlər və
müvafiq olaraq həmin kağızın həqiqətən icazə kağızı olub-olmamasını
da bilməyiblər. Onlarla birlikdə tərcüməçi də gəlib, lakin o, öz
funksiyasını yerinə yetirməyib, sadəcə evdəkilərə deyib ki, polisin
əlində məhkəmə tərəfindən verilmiş hökm var və onlar evi
axtarmalıdırlar”, – Ziyadəliyev bildirir.
Gürcüstan Prokurorluğu axtarışdan bir neçə gün sonra ailəyə axtarış
nəticəsində cinayət işinin açılmadığı barədə məlumat verib. Mülki
fəalın sözlərinə görə, axtarışın nə dərəcədə qanuni olduğu ilə
bağlı prokurorluğa iki dəfə müraciət ediblər və axtarışa əsas
göstərilən məhkəmə hökmünün surətini tələb ediblər.
Prokurorluq cavab olaraq axtarışın qanun çərçivəsində aparıldığını
bildirib. Məhkəmə hökmünün surətinə gəlincə isə, artıq 22 gündür
ki, Çobanovlar ailəsinə verilməyib.
Rəşan Ziyadəliyev “Marneuli” radiosu ilə söhbəti zamanı bildirdi
ki, bir neçə gündən sonra vəkillərlə görüşəcəklər və işin hüquqi
baxımdan araşdırılmasını tələb edəcəklər.