“Gürcüstan naminə” partiyasının Marneuli qərargahının rəhbəri və
partiya siyahısının birinci nömrəsi Davit Qurqenişvili partiya
üzvlərinə təzyiq göstərilməsi faktından söhbət açıb.
Qurqenişvilinin sözlərinə görə, “Gürcü Arzusu” və DTX partiyanın
iki üzvünü, Bələdiyyə Məclisi üzvlüyünə namizədlərini hədələyib və
öz partiyalarına keçirib.
“Pozuntular olduqca çoxdur, təzyiq faktları da var. Konkret olaraq,
bizim partiyanın iki üzvü təzyiq nəticəsində qərar verdilər və
siyahıdan çıxmaqla bağlı ərizə yazdılar. Siyahının üçüncü nömrəsi
Günay Etirmişli və siyahının beşinci nömrəsi, eyni zamanda
Qullar-Kürtlər majoritar deputatlığına namizəd Səfər Piriyev də
ərizə yazıb. Bəzi hallarda namizədin öz partiyalarına keçirilməsi ,
bəzi hallarda, məsələn, Günay Etirmişli ilə əlaqədar hədələmə də
qeydə alınmışdı”, – Davit Qurqenişvili bildirdi.
Qurqenişvilinin sözlərinə görə, “Gürcüstan naminə” partiyası,
təzyiq faktlarına baxmayaraq Marneulidə seçkiqabağı kampaniyasını
fəal şəkildə həyata keçirir.
“Bütün Bələdiyyənin inzibati ərazi vahidliyində görüşlərim olur.
Dünən Kəpənəkçi, Tsereteli və Tamarisi inzibati ərazi vahidliyində
oldum. Bununla yanaşı Marneulinin yaşıl bazarına getdik və əhaliyə
özümüzü, partiyamızı təqdim etdik. Problemlər çoxdur. Dünən Yeni
Dioqnisidə görüşdə idim. İçməli su problemləri var. Kəpənəkçidə isə
suvarma suyu problemi mövcuddur. Əhali kənd təsərrüfatı ilə
məşğuldur və su olmadan məhsul yetişdirmək mümkün
deyil.”
Davit Qurqenişvili əhaliyə vəd verib ki, Bələdiyyə Məclisi üzvü
olarsa, Marneuli bələdiyyəsində hələ də yarımçıq qalmış
infrastruktur layihələrini başa çatdıracaq. Belə layihələrdən biri
su təchizatı-kanalizasiya sisteminin tikintisidir. Həmin layihə ilə
əlaqədar işçilər davamlı aksiyalar keçirir. Marneuli Mərkəzi
stadiounun bərpa işləri isə indiki mərhələdə dayandırılıb.
Qurqenişvilinin sözlərinə görə, “Gürcüstan naminə” partiyası yeganə
siyasi gücdür ki, siyasi arenada ədalətli və vicdanlı şəkildə
mübarizə aparır. Məhz buna görə o, Marneuli Bələdiyyə Məclisinə
düşmək üçün “Gürcüstan naminə” partiyasının sıralarında mübarizə
aparmağa qərar verib.