Marneulinin sərhədyanı kəndlərinə üç həftədir ki, bələdiyyə
nəqliyyatı işləmir.
Opreti, Çanaxçı və Ağkörpü Marneulidən 60 km məsafədə yerləşir.
Əhalinin şəhərə gəlmək və mövcud problemləri həll etmək üçün
həftənin yalnız üç günü imkanı var idi. Ancaq ictimai nəqliyyatın
sıradan çıxması onların reallığını dəyişib. İşləyən adamlar üçün
vəziyyət daha da ağırdır. Anonimliklərinin qorunması zəmanəti ilə
nəqliyyatdan asılı olan yerli sakinlərdən müsahibə aldıq. Çanaxçı
və Opreti sakinləri bələdiyyədən alternativ yol fikirləşməyi tələb
edirlər.
"Elementar bir şey lazım olanda belə heç nə edə bilmirəm. Tbilisiyə
də gedə bilmirəm ki, geri qayıdam. Elə aylar olur, nəqliyyat olmur,
kənddə qapalı qalırıq. Kiminləsə getməsəm, ictimai nəqliyyatdan
istifadə edə bilmirəm. Bazar ertəsi, çərşənbə və bazar günü
işləyirdilər. İki həftədən artıqdır, işləmir. Cavab da vermirlər
ki, nə zaman olacaq, yaxud olmayacaq", – Çanaxçı
sakini deyir.
"İki həftə əvvəl yolda xarab oldu və kəndə güclə gedib çıxdım.
Ondan sonra dedilər ki, xarab olub. Sürücüyə zəng vururduq, deyirdi
ki, hissələr tapılmır, sonra iki günə olacaq, sonra üç günə olacaq.
İki günə olacağını biləndə dözürük, ancaq iki həftə, hətta daha çox
vaxt keçdi. Bu dövr ərzində iş üçün taksi tutdum. İndiyə kimi
alternativ nə isə olmalı idi. Opretidə mağaza da yoxdur, xalq isə
yaşamaq istəyir. Körpə uşaqları var, çörək lazımdır. Bir-birimizə
nələrisə tapşırırdıq. Ümid edirəm, ya avtobus təmir olunar, ya da
başqa bir şey düşünərlər. Çünki bir maaşımızı artıq yola
xərcləmişik", – Opreti sakini deyir.
Marneuli meriyasının balansında olan “Avtopark”ın rəhbəri Qiqa
Calağonianın nə alternativ yolu, nə də ümidverici cavabı yoxdur. O,
"Marneuli" radiosuna bildirdi ki, Opreti, Çanaxçı və Ağkörpünün
çətin relyefi var. Buna görə də nəqliyyatı ora göndərmirlər. Qeyd
olunan xətdə işləyən yeganə marşrutun təmiri üçün isə ehtiyat
hissələr tapılmır.
"Oraya ancaq ikikörpülü avtobus gedir. Başqa avtobus işləyə bilməz.
Başqa ikikörpülü avtobusumuz yoxdur, bunun da mühərriki sıradan
çıxıb. Hissələr tapılmır. Köhnə hissələri təmir etsək də, yaramadı.
Bu mühərrik artıq üçüncü dəfədir, sıradan çıxıb. Mümkün olmayanı
tələb edirlər. Mənə deyir, onda sən bizi apar, deməli belə çıxır.
Alternativ yoxdur, nə qədər vaxta təmir olunacağını da deyə
bilmirik. İndi Azərbaycan və Ermənistanda hissələri axtarıram.
Tapsaq, alacağıq".
Calağonianın sözlərinə görə, bu barədə Marneuli meriyasının da
məlumatı var.