Marneuli meriyası Mədəniyyət Evinin büdcəsini 65 000 lari artırıb.
Qərar Bələdiyyə Məclisinin 13 may tarixində baş tutan iclasında
qəbul olunub.
Məsələni müzakirəyə meriyanın Maliyyə-Büdcə Xidmətinin rəhbəri
Vüqar Məmmədov çıxarıb. O, qeyd edib ki, Mədəniyyət Mərkəzi
vəsaitin bir qismini rəqs ansamblının qastrolları üçün nəzərdə
tutacaq.
“Mədəniyyət Evinə 65 000 lari subsidiya artırırıq. Bildiyiniz kimi,
Çexiya Respublikasında tədbirlər keçirilir və Marneuli
bələdiyyəsinin Mədəniyyət Evinin ansamblı iştirak etməlidir.
Buradan irəli gələrək, bu səfərləri maliyyələşdirməliyik. Bələdiyyə
vəsaitin nəzərdə tutulmasını məqsədyönlü hesab
edir”.
Mədəniyyət Mərkəzinin rəhbəri Nato Şavişvili “Marneuli” radiosu ilə
söhbəti zamanı bildirdi ki, vəsaitin əsas hissəsi “İberia”
ansamblının Çexiyada keçiriləcək müsabiqəyə yola salınmasına, bir
qismi isə Mədəniyyət Mərkəzinin planlaşdırdığı fəaliyyətə, lazımi
ehtiyaclara xərclənəcək.
Qeyd edək ki, Marneuli bələdiyyəsinin Mədəniyyət Mərkəzində
fəaliyyət göstərən “İberia” xoreoqrafik ansamblı Çexiyada
beynəlxalq folklor, rəqs və musiqi müsabiqəsinə – festivala dəvət
olunub. Tədbirin avqust ayında keçirilməsi planlaşdırılır.