Türkiyədə seçkilər - İqtidar müxalifəti səsləri oğurlamaqda ittiham edir
Türkiyədə 31 mart tarixində yerli
özünüidarə seçkiləri keçirilib.
Türkiyə mətbuatının yaydığı
məlumata görə, ilkin nəticələrə əsasən, ölkənin ən böyük şəhəri
İstanbulda müxalif Cümhuriyyət Xalq Partiyasının (CHPP namizədi
Əkrəm İmamoğlu 48.79% səs toplayaraq qalib gəlib. 48.52% səs
toplayan qtidar partiyası Ədalət və İnkişaf Partiyasının (AKP)
namizədi Binali Yıldırım isə ikinci olub.
"Hürriyet"in xəbərinə görə, Ədalət və İnkişaf
Partiyasının İstanbul təşkilatının rəhbəri Bayram Şenocak
seçkilərdə ciddi pozuntular olduğunu bildirib. O, verdiyi bəyanatda
İstanbul miqyasında etibarsız sayılan səslərin çoxluğuna diqqət
çəkib, protokolların düzgün tərtib olunmadığını bildirib. Qeyd edək
ki, İstanbulda 290 271 bülleten etibarsız sayılıb.
İqtidar partiyası seçkilərin nəticələrinə etiraz etməyə və səslərin
yenidən sayılmasını tələb etməyə hazırlaşır.
"Evrensel.net"in yazdığına görə, Əkrəm İmamoğlu
da məsələyə münasibət bildirib.
“Bütün CHP-lilər seçki komissiyalarında keşik çəkməyə gəlsin. Əgər
seçki protokolunda hər hansı bir pozuntu olduğuna dair sübut varsa,
etiraz edə bilərlər, etməlidirlər. Ancaq məsələni tamamilə 300
minədək etibarsız bülletenə bağlamaq düzgün deyil. Arada ciddi say
fərqi var, 23-24 min səs fərqi var. İndi gözlərini etibarsız
sayılmış bülletenlərə dikiblər. 2014-cü il seçkilərində 400 mindən
artıq etibarsız sayılmış bülleten vardı, indi isə 300 min də
yoxdur, həm də seçicilərin sayının artmasına rəğmən. Birlikdə
gedəcəyik, özüm də keşik çəkəcəyəm. Orada olan dostlar komissiyanı
əsla tərk etməyəcəklər”, – deyə İmamoğlu bildirib.
Qeyd edək ki, ilkin nəticələrə görə, 31 mart tarixində keçirilən
yerli bələdiyyə seçkilərində AKP bələdiyyələrin çoxunda qalib gəlsə
də, Ankara, İstanbul, İzmir, Antalya kimi böyük şəhərlərdə
müxalifət partiyası CHP qalib gəlib.
“Marneuli” radiosu