Մառնեուլիի քաղաքապետարանի սակրեբուլոն  հեռացրել է «Գենդեր» և «Ոչ կառավարական» բառերը իր բաժիններից մեկի անվանումից։

Այսօր՝ մայիսի 6-ին, սակրեբուլոյի  նիստում  աշխատակազմի ղեկավար Նինո Բերիձեն հայտարարել է, որ բաժնի անվանումից «Գենդեր» բառի հեռացումը անհրաժեշտ էր օրենսդրական փոփոխությունների պատճառով, այդ իսկ պատճառով քաղաքային խորհրդի «Գենդերային հարցերի և ոչ կառավարական հատվածի հետ կապերի բաժինը» վերանվանվել է «Կանանց և տղամարդկանց հավասարության, նորարարությունների և միջազգային հարաբերությունների բաժին»։

«Փաստորեն, բաժնի լիազորությունները մնում են և մի քանի կետերով ընդլայնվում են, և ավելացվում է նաև կանանց և տղամարդկանց հավասարությունը, և մենք այժմ սպասում ենք համապատասխան փոփոխությունների՝ կապված Գենդերային հավասարության խորհրդի հետ, և հետագայում այս անվանումը նույնպես կփոխվի»։ - ասաց Նինո Բերիձեն

Քաղաքային խորհուրդը կողմ է արտահայտվել բաժնի անվանափոխությանը և անվանումից «Գենդեր» և ​​«ոչ կառավարական հատվածի հետ հարաբերություններ» բառերի հեռացմանը: Սակրեբուլոյի  նախագահ Ամիրան Գիորգաձեն նշել է, որ քաղաքային խորհուրդը քննարկումներից հետո մշակել է բաժնի նոր անվանումը:

«Մենք քննարկումներ ենք ունեցել այս թեմայի շուրջ, մանրամասն քննարկել ենք այս հարցը և վերջապես համաձայնության ենք եկել, որ անվանումը կլինի «Կնոջ և տղամարդու հավասարության, նորարարությունների և միջազգային հարաբերությունների վարչություն», և կարծում եմ՝ ճիշտ ընտրություն ենք կատարել»: - նշել է Ամիրան Գիորգաձեն:

«Վրացական երազանքի» խորհրդարանը 2025 թվականի մարտին կողմ է արտահայտվել «գենդեր» տերմինի օրենսդրությունից հեռացմանը: «Վրացական երազանքի» խորհրդարանում օրինագծի հեղինակներն ու նախաձեռնողները «Վրացական երազանքի» և այսպես կոչված ընդդիմադիր «Ժողովրդական իշխանության» պատգամավորներն էին: Օրենսդրական փոփոխության համաձայն՝ «գենդեր» տերմինը վերացել է Վրաստանի օրենսդրությունից և փոխարինվել է «կանանց և տղամարդկանց միջև հավասարությամբ»:
Գենդերը  որոշվում է սոցիալական և մշակութային գործոններով և վերաբերում է կանանց և տղամարդկանց սոցիալապես ձեռք բերված վարքագծերի, բնութագրերի և վերաբերմունքի ամբողջությանը:

"Ռադիո Մառնեուլի"
Թարգմ․  ՝  Մարգարիտա  Միսկարյան