ქვემო ქართლში სახელმწიფო რწმუნებულის ადმინისტრაციის განცხადების მიხედვით, ქვემო ქართლის რეგიონში მიწის სისტემური რეგისტრაციის რეფორმა მიმდინარეობს, რომლის ფარგლებშიც აზომვითი სამუშაოები დასკვნით ეტაპს უახლოვდება. პროცესი მიზნად ისახავს მოქალაქეებისთვის საკუთრების უფლების დადგენასა და ქონებრივი მონაცემების მოწესრიგებას.

ქვემო ქართლში სახელმწიფო რწმუნებულის ადმინისტრაციაში გაიმართა სამუშაო შეხვედრა იუსტიციის სამინისტროს საჯარო რეესტრის ეროვნული სააგენტოს წარმომადგენლებთან. შეხვედრას ესწრებოდნენ სახელმწიფო რწმუნებული ლევან ხარაბაძე, სააგენტოს თავმჯდომარე დავით დევიძე და მუნიციპალიტეტების მერები. განხილული იქნა რეფორმის მიმდინარეობა და დაგეგმილი აქტივობები.

აზომვითი სამუშაოების მიმდინარეობა
სახელმწიფო რწმუნებულის ადმინისტრაციის განცხადებით, ქვემო ქართლის რეგიონში მიწის სისტემური რეგისტრაციის ფარგლებში საველე აზომვითი სამუშაოები დასკვნით ფაზაშია. მუნიციპალიტეტებში მიწის ნაკვეთების აზომვა აქტიურად გრძელდება. ამჟამად ქვემო ქართლში 183 500-მდე მიწის ნაკვეთია აზომილი. დაგეგმილია ადმინისტრაციულ ერთეულებში შემავალი სოფლების სრული აზომვა.

განცხადების მიხედვით, 2022 წლიდან დღემდე, ქვეყნის მასშტაბით აზომილია 1 800 000-ზე მეტი მიწის ნაკვეთი, ხოლო საკუთრების უფლება დარეგისტრირდა 1 300 000-ზე მეტ მიწის ნაკვეთზე. მთავრობის გადაწყვეტილებით, მიწის სისტემური რეგისტრაციის რეფორმა 2025 წლის ბოლომდე გაგრძელდება.

ინფორმაციის საჯაროობა და მოქალაქეთა ჩართულობა
სახელმწიფო რწმუნებულის ადმინისტრაცია განმარტავს, რომ აზომილი ნაკვეთების შესახებ ინფორმაცია საჯაროდ ქვეყნდება. მოქალაქეებს აქვთ ერთი თვის ვადა, რათა გაეცნონ სარეგისტრაციო მონაცემებს და შესაძლო უზუსტობების შემთხვევაში მიმართონ საჯარო რეესტრს. რეგისტრაციამდე, საჯარო რეესტრი მონაცემებს უზიარებს მუნიციპალიტეტებსა და სხვა სახელმწიფო უწყებებს, რაც ხელს უწყობს რეგისტრირებული მონაცემების გადამოწმებას.

მოქალაქეებს, ვინც ვერ ჩაერთო მიმდინარე რეფორმაში, შეუძლიათ მიწის ნაკვეთის აზომვის მოთხოვნის განაცხადი შეავსონ იუსტიციის სახლებში, ადგილობრივი თვითმმართველობის დაწესებულებებში ან ვებპორტალზე slr.napr.gov.ge. საჯარო რეესტრის ამგეგმავთა ჯგუფები თითოეულ მოქალაქეს დაუკავშირდებიან რეფორმის დასრულებამდე და გაუწევენ შესაბამის მომსახურებას.