სოფელ სადახლოს, წოფისა და ახქერფის დამაკავშირებელი გზის რეაბილიტაციისთვის 10 933 220 ლარია გათვალისწინებული. 
საქართველოს მთავრობის განკარგულებითა და ინფრასტრუქტურის სამინისტროს საავტომობილო გზების დეპარტამენტის გადაწყვეტილებით, ქვემო ქართლში სადახლო-წოფი-ახქერფის დამაკავშირებელი საავტომობილო გზის რეაბილიტაცია იგეგმება. პროექტის განსახორციელებლად ელექტრონული ტენდერი უკვე გამოცხადდა.

საუბარია შიდასახელმწიფოებრივი მნიშვნელობის გზის 7.2-კილომეტრიან მონაკვეთზე (კმ19-კმ26.2), რომელიც სომხეთის რესპუბლიკის საზღვრამდე მიდის. სარეაბილიტაციო სამუშაოების სავარაუდო ღირებულება 10 933 220 ლარს შეადგენს.

რა სამუშაოები ჩატარდება აღნიშნულ მონაკვეთზე?

პროექტით გათვალისწინებულია საგზაო ინფრასტრუქტურის სრული განახლება, რაც მოიცავს:

მიწის ვაკისისა და საგზაო სამოსის მოწყობას;

ხელოვნური ნაგებობების მშენებლობას;

მოსახლეობისთვის მიერთებებისა და ეზოში შესასვლელების მოწყობას;

უსაფრთხოებისთვის ლითონის მრუდხაზოვანი ზღუდარებისა და გზის სხვა აუცილებელი კუთვნილებების დამონტაჟებას.

ტენდერში მონაწილეობის მსურველი კომპანიებისთვის წინადადებების მიღება 2026 წლის 23 მარტს სრულდება.