მარნეულის მუნიციპალიტეტის ადგილობრივი თვითმმართველობა მუნიციპალიტეტში მცხოვრებ სოციალურად დაუცველ ოჯახებს სახნავ-სათეს მიწებს დაუხნავს. გადაწყვეტილება მარნეულის მუნიციპალიტეტის საკრებულომ დღეს, 14 აპრილს მიიღო. საკითხი განსახილველად საკრებულოს წევრმა, ადილ აილევმა გამოიტანა და თემის განხილვა მერიის ქონების მართვისა და მატერიალურ-ტექნიკური უზრუნველყოფის სამსახურის უფროსის მოვალეობის შემსრულებლმა დავით ხარშილაძემ განაგრძო და თქვა, რომ მუნიციპალიტეტი მსგავს პროგრამას 2022 წლიდან ახორციელებს.

“ მარნეულის მუნიციპალიტეტი 2022 წლიდან სოფლის

მხარდაჭერის პროგრამის ფარგლებში ყოველწლიურად ახორციელებს 100 000 ქულამდესოციალურად დაუცველი მოსახლეობის მიწის ნაკვეთების მოხვნას, რომელიც გულისხმობს 5 000 კვადრატულ მეტრამდე მიწის ფართობის მოხვნას. გასულ წელს უფასოდ მოხნული იყო 32 000 გექტრამდე მიწის ნაკვეთი” -თქვა დავით ხარშილაძემ.

მიწის ნაკვეთების დამუშავება ააიპ “სუფთა მარნეულს” ევალება, რომელიც დახვნით სამუშაოებს 5 ერთეული ტრაქტორით განახორციელებს.
მიწის დამუშავების მსურველმა მოქალაქეებმა ადმინისტრაციულ ერთეულებში მერის წარმომადგენლებს უნდა მიმართონ, ან უშუალოდ მერიაში მივიდნენ.

14 აპრილის საკრებულოს სხდომაზე დღის წესრიგით 5 საკითხი განიხილეს. მათ შორის საუბარი შეეხო 2025 წლის ბიუჯეტის შესრულებას, ალგეთში ნაპირსამაგრი სამუშაოების დაწყებას და სოფლის მხარდაჭერის პროგრამას. დეპუტატებმა ყველა საკითხზე დადებითი გადაწყვეტილება მიღეს.