შაჰველად აივაზოვი საქართველოში მომუშავე ფოტოჟურნალისტია, რომლის კარიერა რამდენიმე ათწლეულს მოიცავს. სხვადასხვა დროს ის აშუქებდა როგორც საქართველოში, ისე მის ფარგლებს გარეთ მომხდარ მოვლენებს, მათ შორის: 9 აპრილის პროტესტს, ჩეჩნეთის ომსა და კონფლიქტებს საქართველოს რეგიონებში.

მისი ფოტოარქივის ნაწილის ერთ სივრცეში მოსაქცევად, საქართველოს კულტურის სამინისტროსა და საქართველოს ჟურნალისტთა ფედერაციის ერთობლივი პროექტის ფარგლებში, წიგნი-ალბომი გამოიცა. ორენოვანი (ქართულ-ინგლისური) გამოცემა სტამბა „CEZANNE“-ში „კრეატიული საქართველოს“ მხარდაჭერით დაიბეჭდა. პროექტის ავტორი და ხელმძღვანელია გიორგი მამაცაშვილი.

ბიოგრაფიული მონაცემები
შაჰველად აივაზოვი 1956 წლის 26 ივნისს თბილისში დაიბადა. ფოტოგრაფიით სკოლის პერიოდში, მეშვიდე კლასში დაინტერესდა, როდესაც პირველი კადრები „Smena“-ს მარკის ფოტოაპარატით გადაიღო.

მან დაამთავრა თბილისის სახელმწიფო უნივერსიტეტის ჟურნალისტიკის ფაკულტეტი. პროფესიული საქმიანობა საინფორმაციო სააგენტო „საქინფორმში“ ფოტოკორესპონდენტად დაიწყო. 1992 წლიდან დღემდე თანამშრომლობს საერთაშორისო საინფორმაციო სააგენტო „Associated Press“-თან (AP).

შაჰველად აივაზოვი არის ომისა და შეიარაღებული ძალების ვეტერანი და ჟურნალისტთა ფედერაციის მმართველი საბჭოს წევრი. მიღებული აქვს „ღირსების“ ორდენი, ალექსანდრე როინაშვილის სახელობის დიპლომი და თავდაცვის სამინისტროს გრან-პრი. ასევე არის საერთაშორისო ფოტოკონკურსების მონაწილე და ლაურეატი.

ამჟამად ის საქართველოში მოქმედ აზერბაიჯანულენოვან გაზეთ „გურჯისტანში“ მუშაობს.