მარნეულის მუნიციპალიტეტის მერიამ ქალაქ მარნეულში, რუსთაველის ქუჩა N106-ში მდებარე კულტურის სახლის შენობის სარეაბილიტაციო სამუშაოების გამო არსებული ინვენტარის დროებით გადასატანად შესაბამის სასაწყობე ფართს ეძებს და ბაზრის კვლევას აცხადებს.

აღნიშნულ ინფორმაციას მარნეულის მერია ოფიციალურ ვებ-გვერდზე (marneuli.gov.ge) ავრცელებს.

დაინტერესებულ პირებს საშუალება აქვთ, 2026 წლის 10 აგვისტოს ჩათვლით (09:00-დან 18:00 საათამდე) წარადგინონ საკუთარი წინადადებები საიჯარო ობიექტის სავარაუდო ღირებულების მითითებით.

წინადადებების ჩაბარება შესაძლებელია მერიის ადმინისტრაციული სამსახურის საქმისწარმოებისა და მოქალაქეთა მომსახურების განყოფილებაში (მისამართი: ქ. მარნეული, რუსთაველის ქუჩა N73).

სასაწყობე ფართის ძირითადი მოთხოვნები:

• • ფართობი და სიმაღლე: არანაკლებ 350 კვ.მ. და არაუმეტეს 500 კვ.მ.; ჭერის სიმაღლე არანაკლებ 5.5 მეტრი.
• • მდებარეობა: კულტურის სახლის შენობიდან არაუმეტეს 5 კილომეტრის დაშორებით, ლოჯისტიკურად ხელსაყრელ და შეუფერხებელ ადგილზე (სატვირთო ტრანსპორტისთვის).
• • სივრცის დაგეგმარება: ერთიანი სივრცე შიდა ტიხრების გარეშე ან მინიმალური ტიხრებით.
• • ტექნიკური მახასიათებლები: ელექტროენერგია (სასურველია წყალიც), ვიდეოკონტროლის სისტემა და შესასვლელი კარი, საიდანაც შესაძლებელი იქნება ინვენტარით დატვირთული სატვირთო/მანიპულატორით შესვლა.
• • უსაფრთხოება: ფართი დაცული უნდა იყოს წვიმისა და სხვა გარემო ფაქტორებისგან.

დოკუმენტაციის თანახმად შემოსულ წინადადებებს მარნეულის მუნიციპალიტეტის მერის მიერ შექმნილი სამუშაო ჯგუფი განაცხადების მიღების დასრულებიდან არაუგვიანეს 5 სამუშაო დღეში განიხილავს. ბაზრის კვლევის პროცესში მერია იტოვებს უფლებას, საჭიროებისამებრ დაათვალიეროს წარმოდგენილი ობიექტები.