სამირა ბაირამოვას „ალტ ინფოს“ მხარდამჭერი მოკვლით ემუქრება - შსს-მ გამოძიება მუქარის მუხლით დაიწყო
საქართველოს შინაგან საქმეთა სამინისტრომ სამირა ბაირამოვას მიმართ განხორციელებულ მუქარის ფაქტზე გამოძიება სისხლის სამართლის კოდექსის 151-ე მუხლით დაიწყო, რაც ნიშნავს სიცოცხლის მოსპობის ან ჯანმრთელობის დაზიანების მუქარას.

მარნეულელმა სამოქალაქო აქტივისტმა სამირა ბაირამოვამ სამართალდამცავ უწყებას დღეს, 15 თებერვალს, მას შემდეგ მიმართა, რაც „ალტ ინფოს“ ერთ-ერთმა მხარდამჭერმა სიცოცხლის მოსპობის მუქარის შემცველი შეტყობინება გაუგზავნა.

სამირა ბაირამოვას მიერ მარნეულში „ალტ ინფოს“ დაფუძნებული პარტია „კონსერვატიული მოძრაობის“ ოფისის გადაღებვის შემდგომ სოციალურ ქსელში აქტივისტის მიმართ მუქარის შემცველი და შეურაცხმყოფელი კომენტარები კეთდება. სამირა ბაირამოვას რამდენიმე პირმა მუქარის შემცველი წერილებიც გაუგზავნა.

რადიო „მარნეულის“ მიერ გამოქვეყნებულ ვიდეოზე კი ათობით სიძულვილის ენის და მუქარის შემცველი კომენტარი დაიწერა. კომენტარების ავტორების უმრავლესობა ყალბ ფეისბუქ ანგარიშებს იყენებს. მათ გვერდზე გადასვლისას არ მოიძებნება პიროვნების ფოტო და პირადი მონაცემები, გვერდის დათვალიერების შედეგად კი ჩნდება შთაბეჭდილება, რომ მას გარკვეული ჯგუფები საკუთარი ინტერესებიდან გამომდინარე იყენებენ.

„გამომიგზავნეს შეტყობინება, ვიცი ეს პირი დაახლოებით ვინცაა, დესტრუქციული ძალების წევრია. ადრე იყო „ქართული მარშის“ წევრი, ახლა კი „ალტ ინფოს“ აქტივისტია, ეს პიროვნება სვანეთშიც იყო წასული, როგორც გავიგე სვანეთში „ალტ ინფოს“ ოფისის დახურვის დროსაც აქტიურობდა ეს ბიჭი. ამ ბიჭმა არაერთხელ გამომიგზავნა მსგავსი, მუქარის შემცველი, შეტყობინება, მაგრამ ეხლა გადავწყვიტე, რომ პოლიციაში განაცხადი შემეტანა, რადგან ის მემუქრებოდა მოკვლით. ახლა მოვედი პოლიციაში, დღეს, დილის 12 საათზე გავაკეთე განაცხადი და ახლა დამიბარეს გამოკითხვაზე“. - აცხადებს სამირა ბაირამოვა

მარნეულელი სამოქალაქო აქტივისტის განმარტებით, მას არ აქვს მოლოდინი, რომ სამართალდამცველები საქმეს ობიექტურად გამოიძიებენ.

„დიდად არაფერს ველოდები რადგან ეს არაა პირველი შემთხვევა როცა ჩემს მიმართ მუქარის შემცველ განცხადებებზე არაერთხელ მივმართე პოლიციას, მაგრამ ყველა მცდელობა ჩემი მხრიდან უშედეგოდ დასრულდა. მაგალითად, გასულ წელსაც კი „ალტ ინფოსთან“ დაკავშირებული ჯგუფები სულ მითვალთვალებდნენ მარნეულში. გასულ წელს როდესაც კარანტინი დასრულდა და სამსახურში სიარული დავიწყე შევნიშნე, რომ რამდენიმე ადამიანი მითვალთვალებდა, ხოლო ორჯერ, სამსახურში მიმავალ გზაზე, მანქანის დაჯახებაც კი სცადეს. ამ ფაქტებთან დაკავშირებით სამართალდამცველებისთვის არ მიმიმართავს, რადგან როგორც უკვე ვახსენე ადრე მქონდა განაცხადი გაკეთებული და რეაგირება არ ყოფილა, თან ვიცოდი, რომ ერთ-ერთი ადამიანის, რომელიც მე მითვალთვალებდა, ძმა მარნეულის პოლიციაში მუშაობდა, ამიტომ აღარ მივმართე სამართალდამცველებს“. - გვითხრა სამირა ბაირამოვამ

14 მარტს, მარნეულში ალტ-ინფოს პარტიის ოფისი შეღებეს. ოფისის ფასადი უკრაინის დროშის ფერებში მარნეულელმა სამოქალაქო აქტივისტმა, საიმირა ბაირამოვამ შეღრება და თქვა, რომ რუსეთის იდეოლოგიის გამზიარებელი პარტიები საქართველოში არ უნდა ფუნქციონირებდნენ.

მარნეულში ,,ალტ-ინფოს" მიერ დაფუძნებული პარტია ,,კონსერვატიული მოძრაობის" ფილიალი რუსთაველის ქუჩის N89-ში 14 მარტს გაიხსნა, მაშინ რუსთავისა და მარნეულის ოფისის ხელმძღვანელმა, მერაბ გიგანმა თქვა, რომ , პარტიამ ქვემო ქართლის თითქმის ყველა მუნიციპალიტეტში გახსნა ოფისი, ამბობს რომ მათი მიზანი მოსახლეობისთვის სამომავლო გეგმების და მიზნების გაცნობაა.

ამ ეტაპზე ქვემო ქართლში პარტია ,,კონსერვატიულ მოძრაობის" ოფისები უკვე გახსნილია დმანისში, ბოლნისში, მარნეულში, თეთრ წყაროში, რუსთავში, გარდაბანში.

პროტესტის ნიშნად მოქალაქეებმა ალტ-ინფოს პარტიის ოფისები საქართველოს რამდენიმე მუნიციპალიტეტიში შეღებეს.

Print