მარნეულის მუნიციპალიტეტის მასშტაბით, 8 საარჩევნო უბანზე, იმიტირებული კენჭისყრის პროცესი გაიმართება. კენჭისყრის პროცესში მონაწილეობის მიღება ნებისმიერ მსურველს შეეძლება. ცენტრალური საარჩევნო კომისიის მიერ გავრცელებული ინფორმაციის მიხედვით, იმიტირებული კენჭისყრის პროცესის მიზანი საარჩევნო ტექნოლოგიების გამოყენების შესახებ ამომრჩეველთა ინფორმირება და ხმის მიცემის პროცედურების პრაქტიკული უნარ-ჩვევების გამომუშავებაა.


„საარჩევნო ადმინისტრაცია ელექტრონულ არჩევნებთან დაკავშირებით ინფორმირების კამპანიის ფარგლებში კიდევ ერთ მასშტაბურ პროექტს განახორციელებს. 11 სექტემბერს, ქვეყნის მასშტაბით 598 საარჩევნო

უბანზე, მათ შორის ეთნიკური უმცირესობებით დასახლებულ რეგიონებში, იმიტირებული კენჭისყრა გაიმართება და მასში მონაწილეობა ნებისმიერ ამომრჩეველს შეეძლება“. - აღნიშნულია ცესკოს განცხადებაში

იმიტირებული კენჭისყრის პროცესი 11 სექტემბერს გაიმართება. კენჭისყრა 11:00 საათიდან დაიწყება და 18:00 საათამდე გაგრძელდება.

„ამომრჩევლები პირადად გაეცნობიან ვერიფიკაციისა და ხმის მთვლელი აპარატების მუშაობას. საარჩევნო მოხელეები დაინტერესებულ პირებს განუმარტავენ რეგისტრაციის პროცედურას, ისინი ასევე თავად გაივლიან ხმის მიცემის პროცედურებს - რეგისტრატორის მაგიდასთან ბიულეტენზე საცდელი წრის გაფერადება, ფარული კენჭისყრის კაბინაში ბიულეტენზე წრის გაფერადება, ფარულობის უზრუნველყოფის მიზნით ჩარჩო-კონვერტში ბიულეტენის მოთავსება, ხმის მთვლელ აპარატში (ყუთში) ბიულეტენის მოთავსება“. - აღნიშნულია ცესკოს განცხადებაში

მარნეულის მასშტაბით იმიტირებული საარჩევნო უბნები შემდეგ ლოკაციაზე გაიხსნება:

ქალაქ მარნეული - N5 საჯარო სკოლა;
დაბა შაუმიანი - შაუმიანის N3 საჯარო სკოლა;
სოფელი ალგეთი - საბავშვო ბაღი;
სოფელი წერეთელი - საჯარო სკოლა;
სოფელი ქუთლიარი - საჯარო სკოლა;
სოფელი ყიზილაჯლო - საჯარო სკოლა;
სოფელი ყულარი - საჯარო კსოლა;
სოფელი შულავერი - საჯარო სკოლა;


იმიტირებული საარჩევნო პროცესი ქვემო ქართლის ყველა მუნიციპალიტეტში გაიმართება. რუსთავში 12 უბანი გაიხსნება, გარდაბანში 7, ბოლნისში 23 უბანი, დმანისში 16 უბანი, წალკაში 5 უბანი და თეთრიწყაროში 5 უბანი გაიხსნება.

რადიო „მარნეული“