ქალაქ მარნეულში მუსხელიშვილის ქუჩაზე, N6 საჯარო სკოლის მიმდებაედ, 7 ახალ კორპუსს ააშენებენ. მარნეულის მუნიციპალიტეტის საკრებულომ, 6 ნოემბერს გამართულ სხდომაზე, დაამტკიცა მუსხელიშვილის ქუჩაზე ახალი კორპუსების აშენების დეტალური გეგმა.

„ქალაქ მარნეულში, მუსხელიშვილის ქუჩაზე, იგეგმება 7 ერთეული მრავალბინიანი საცხოვრებელი სახლის მოწყობა. ასევე, იგეგმება სპორტული მოედნის მოწყობა, სკვერის მოწყობა, პარკინგების მოწყობა და საფეხმავლო ბილიკების მოწყობა. ანუ, შეგვიძლია ვთქვათ, რომ ერთ-ერთი ლამაზი უბანი

შეემატება ქალაქ მარნეულს და ძალიან კარგი იქნება თუ განხორციელება ეს პროექტი“. - განაცხადა მარნეულის მერიის წარმომადგენელმა საკითხის მოხსენებისას

მისი განმარტებით, ახალი საცხოვრებელი კორპუსები 2.5 ჰექტარ ტერიტორიაზე განთავსდება.

პროექტს შპს მმკ გრუპი განახორციელებს. შპს მმკ გრუპი 2021 წელს დაფუძნდა. მისი დამფუძნებელი და 100%-იანი წილის მფლობელი დავით მურადაშვილია.

მარნეულის საკრებულოს სხდომაზე სულ 4 საკითხი განიხილეს და ყველა მათგანზე დადებითი გადაწყვეტილება მიიღეს.

რადიო „მარნეული“