გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტმა გურიაში, იმერეთსა და მცხეთა-მთიანეთში ქვიშა-ხრეშის უკანონო მოპოვების სამი ფაქტი გამოავლინა. სამართალდარღვევები დაფიქსირდა ოზურგეთის, ხონისა და მცხეთის მუნიციპალიტეტებში.

სამართალდამრღვევებმა სპეციალური ტექნიკის გამოყენებით მდინარეების – სუფსის, ცხენისწყლისა და მტკვრის კალაპოტებიდან ჯამში დაახლოებით 60 კუბურ მეტრამდე ქვიშა-ხრეში უკანონოდ მოიპოვეს.

ექსპერტები ვარაუდობენ, რომ ასეთი საქმიანობა სერიოზულ ეკოლოგიურ ზიანს აყენებს გარემოს – შესაძლოა კალაპოტების დეფორმირება, ნაპირების ჩამონგრევა, ეროზია, წყლის დონის კლება და ეკოსისტემების განადგურება მოხდეს.