შინაგან საქმეთა სამინისტროს სასაზღვრო პოლიციის ოპერატიულ-საგამოძიებო დეპარტამენტის საგამოძიებო სამსახურის თანამშრომლებმა საქართველოს სახელმწიფო საზღვრის უკანონოდ გადაკვეთისა და ჯგუფურად გადაკვეთის ბრალდებით 4 პირი დააკავეს.

უწყების ინფორმაციით, ჩატარებული ოპერატიული ღონისძიებებისა და საგამოძიებო მოქმედებების შედეგად დადგინდა, რომ დაკავებულებმა სასაზღვრო სექტორ „სარფის“ დასაცავ მონაკვეთზე სასაზღვრო-საკონტროლო გამტარი პუნქტის გვერდის ავლით ქვეითად და სატვირთო ავტომანქანაში დამალვის გზით უკანონოდ გადმოკვეთეს საქართველოს სახელმწიფო საზღვარი და ქვეყანაში შემოვიდნენ.

სამართალდამცველების ცნობით, დაკავებულთაგან ერთ-ერთი ინტერპოლის წითელი ცირკულარით იძებნებოდა.

უწყების ინფორმაციით, დაკავებულ პირებზე გატარდა საემიგრაციო პროცედურები, რის შედეგადაც განხორციელდა მათი ქვეყნიდან გაძევება.