2026 წლის იანვარ-მაისში საქართველოში 3 266 ისეთი ახალი ბიზნეს სუბიექტი დარეგისტრირდა, რომელთა მესაკუთრეებიც რუსეთის მოქალაქეები/კომპანიები არიან - ამის შესახებ ირკვევა სტატისტიკის ეროვნული სამსახურის მიერ „ბიზნესპრესნიუსისთვის“ მოწოდებული ინფორმაციიდან.

მონაცემები აჩვენებს, რომ 2021-2025 წლებში ქვეყანაში ჯამში 43 923 რუსული ბიზნეს სუბიექტია რეგისტრირებული. ამასთანავე, 2021 წელს 2025 წელთან შედარებით, 8.6-ჯერ გაიზარდა საქართველოში რუსული კომპანიების რეგისტრაციები.

უფრო კონკრეტულად, „ბიზნესპრესნიუსი“ გთავაზობთ ბოლო 5-წელში საქართველოში რეგისტრირებული რუსული ბიზნესების რაოდენობას:

• 2021 წელი - 875 ბიზნეს სუბიექტი;
• 2022 წელი - 15 021 ბიზნეს სუბიექტი;
• 2023 წელი 12 449 ბიზნეს სუბიექტი;
• 2024 წელი - 7 997 ბიზნეს სუბიექტი;
• 2025 წელი - 7 581 ბიზნეს სუბიექტი.

შეგახსენებთ, 2026 წლის 1-ელი ივნისის მდგომარეობით, საქართველოში ჯამში 1 127 945 ბიზნეს სუბიექტია რეგისტრირებული, საიდანაც მხოლოდ 275 823 კომპანიაა (24%) მოქმედი.

საქმიანობის სფეროების მიხედვით რაოდენობრივად ყველაზე მეტი, 222 152 ბიზნესი - საბითუმო და საცალო ვაჭრობა; ავტომობილების და მოტოციკლების რემონტშია, რეგისტრირებული, საიდანაც 67% უფუნქციოა.