შინაგან საქმეთა სამინისტრო ბლოგერსა და ოპოზიციონერ აქტივისტს, თორნიკე რაზმაძეს, სოციალურ ქსელში დაწერილი კომენტარის გამო წვრილმან ხულიგნობას ედავება. საქმე ეხება რუსი პროპაგანდისტების — მარგარიტა სიმონიანისა და ვლადიმირ სოლოვიოვის მისამართით გაკეთებულ ჩანაწერს.

რას ედავება შსს ბლოგერს?
ადმინისტრაციული სამართალდარღვევის ოქმის მიხედვით, შსს-ს ადამიანის უფლებების დაცვის დეპარტამენტის სიძულვილის ენის წინააღმდეგ ბრძოლის სამმართველოს ინსპექტორმა რაზმაძის Facebook-გვერდი „სისტემური მონიტორინგის“ ფარგლებში დაათვალიერა.

სამინისტროს ცნობით, ბლოგერმა 2026 წლის 12 ივნისს გამოქვეყნებული ვიდეოს ქვეშ შეურაცხმყოფელი კომენტარი დატოვა. უწყება მიიჩნევს, რომ აღნიშნული ქმედება ადმინისტრაციულ სამართალდარღვევათა კოდექსის 166-ე მუხლის პირველ ნაწილს (წვრილმანი ხულიგნობა) მიეკუთვნება.

მოსალოდნელი სასჯელი: ჯარიმა 500-დან 3 000 ლარამდე ან ადმინისტრაციული პატიმრობა 20 დღემდე ვადით.

„შინაგან საქმეთა სამინისტრო მედავება, რუს პროპაგანდისტებს, მარგარიტა სიმონიანსა და ვლადიმირ სოლოვიოვს, რატომ მიაყენე შეურაცხყოფა და რატომ აგინეო“, — აცხადებს რაზმაძე ვიდეომიმართვაში.

რა გახდა დავის მიზეზი?
ივნისში გამოქვეყნებულ ვიდეოში თორნიკე რაზმაძემ მარგარიტა სიმონიანისა და პრემიერ-მინისტრ ირაკლი კობახიძის განცხადებები შეადარა.

მარგარიტა სიმონიანის განცხადება: რუსულ ტელეეთერში პროპაგანდისტმა აღნიშნა, რომ მეფე ერეკლე II-მ „მუხლებზე დამდგარმა სთხოვა რუსეთს“ საქართველოს მიღება და დასძინა, რომ „დედა-რუსეთი თავისას იბრუნებს“.

ირაკლი კობახიძის განცხადება: პრემიერ-მინისტრმა 18 აგვისტოს განაცხადა, რომ ერეკლე II-ის მიერ „გეორგიევსკის ტრაქტატის“ გაფორმება „ერთადერთი სწორი, უალტერნატივო გადაწყვეტილება“ იყო.

ბლოგერი მიუთითებდა, რომ დღეს რუსეთი საქართველოს ოკუპანტია და მასთან ნებისმიერი სახის თანამშრომლობა პირდაპირ მტერთან თანამშრომლობას ნიშნავს.

კონტექსტი: შსს-ს ახალი სამმართველო და კანონმდებლობის გამკაცრება
შსს-ში „სიძულვილის ენის წინააღმდეგ ბრძოლის სამმართველო“ 2026 წლის 1 ივნისიდან ამოქმედდა. მისი მთავარი ფუნქცია საჯარო სივრცეში გავრცელებული განცხადებების მონიტორინგი და სამართალდარღვევის ოქმების შედგენაა. სამოქალაქო სექტორის ნაწილი ახალ სტრუქტურას „სქროლვა-სქრინვის სააგენტოს“ უწოდებს.

საკანონმდებლო ცვლილებები, რომლითაც გამკაცრდა ჯარიმები და პატიმრობის ვადები საპროტესტო აქციებსა და საჯარო სივრცეში გამოხატვაზე, ადგილობრივი და საერთაშორისო ორგანიზაციების მხრიდან გამოხატვისა და შეკრების თავისუფლების შეზღუდვის გამო მწვავედ კრიტიკდება.