საპარლამენტო არჩევნებში 25% “ოცნებას” მისცემდა ხმას, 18% – ენმ-ს – IPSOS-ის კვლევა რ2-ის დაკვეთით
14:02 / 17.05.2019
“რუსთავი 2” საერთაშორისო კვლევითი ორგანიზაცია
IPSOS-ის მიერ ჩატარებული საზოგადოებრივი აზრის კვლევის შედეგებს
აქვეყნებს.
“რუსთავი 2”-ის დაკვეთით ჩატარებული კვლევის შედეგების მიხედვით, ხვალ
რომ საპარლამენტო არჩევნები ტარდებოდეს, გამოკითხულთა 25% ხმას
“ქართულ ოცნებას” მისცემდა, 18% – “გაერთიანებული ოპოზიციას”, ხოლო 7%
– “ევროპული საქართველოს”. მეოთხე და მეხუთე ადგილებს 3-3%-ით
“პატრიოტთა ალიანსი” და “ლეიბორისტული პარტია” ინაწილებენ.
გამოკითხულთა 18% ამბობს, რომ არ იცის, რომელ პარტიას მისცემს ხმას.
17% არცერთი პარტიის მხარდაჭერას არ აპირებს, ხოლო 9% პასუხზე უარს
აცხადებს.
ალოკაციის გათვალისწინებით, იგივე კითხვაზე (ხვალ რომ საპარლამენტო
არჩევნები ტარდებოდეს, ვის მისცემდით ხმას) პასუხები შემდეგნაირად
ნაწილდება:
“ქართული ოცნება” – ბიძინა ივანიშვილი – 29.2%;
“გაერთიანებული ოპოზიცია” – 22%;
“ევროპული საქართველო” – 10.4%;
“ლეიბორისტული პარტია” – 4.9%;
“პატრიოტთა ალიანსი” – 4.7%.
ალოკაცია ნიშნავს მეთოდს, რომლითაც მკვლევრები სხვა კითხვებზე
მიღებული პასუხებიდან გამომდინარე ვარაუდობენ, თუ ვის მისცემენ ხმას
ეს რესპონდენტები, რომლებიც არ პასუხობენ კითხვას, თუ ვის უჭერენ
მხარს.
ამავე კვლევის თანახმად, გამოკითულთა 46%-ს ყველაზე პოზიტიური
განწყობა “ევროპული საქართველოს” მიმართ აქვს, 40%-ს – გაერთიანებული
ოპოზიციის, 38% კი – “ქართული ოცნების”.
“რუსთავი 2”-ის ინფორმაციით, IPSOS-მა კვლევა მიმდინარე წლის 1-14
მაისის პერიოდში ჩაატარა. გამოიკითხა
შემთხვევითი შერჩევის მეთოდით შერჩეული 1 540 რესპონდენტი. კვლევის
შესაძლო ცდომილების ზღვარი +/–2.2%-ია.
ცნობისთვის, IPSOS 1975 წელს დაარსდა (პარიზი, საფრანგეთი). Ipsos-ის
ოფისები დღეს 87 ქვეყანაში აქვს და, საერთო ჯამში, 16 530
თანამშრომელი ჰყავს. კომპანია ოთხი ძირითადი მიმართულებით საქმიანობს:
მარკეტინგული კვლევები; მედია და სარეკლამო კვლევა; საზოგადოებრივი და
სოციოლოგიური კვლევები; კლიენტისა და თანამშრომლის ურთიერთობის
მართვა.
IPSOS არის სკომპანია, რომელსაც იუსტიციის სამინისტრომ სასამართლო
რეფორმის შესახებ კვლევა დაუკვეთა.