საკრებულოს არჩევნები პროპორციული სისტემით უნდა ჩატარდეს - ახმედ იმამკულიევი - მარნეულის რადიო

საკრებულოს არჩევნები პროპორციული სისტემით უნდა ჩატარდეს - ახმედ იმამკულიევი

14:37 / 06.08.2019

„ველოდებით ცვლილებებს ადგილობრივ თვითმმართველობებთან დაკავშირებით“ - ეს განცხადება რადიო „მარნეულთან“ საარჩევნო კოდექსში შესატან ცვლილებებზე საუბრისას „ევროპული საქართველოს“ პოლიტიკური საბჭოს წევრმა ახმედ იმამკულიევმა გააკეთა.

იმამკულიევი თვლის, რომ საპარლამენტო არჩევნების მსგავსად, ადგილობრივი თვითმმართველობის არჩევნების დროსაც პროპორციული სისტემა უნდა მუშაობდეს, რათა მმართველ პარტიას გავლენიანი ადამიანების მეშვეობით საკრებულოების უმრავლესობის დაკავების შესაძლებლობა არ ჰქონდეს.

„ჩვენ ვხედავთ მანიპულაციას ადგილობრივი პოლიტიკური პარტიების მხრიდან, როდესაც ისინი ყოველთვის იყენებენ ავტორიტეტიან, ფულიან, ადამიანს საკრებულოში მოსახვედრად. როდესაც იქნება პროპორციული სია, ამ შემთხვევაში ვნახავთ ისეთ ადამიანებს, რომლებიც იქნებიან ნიჭიერები და საჭირო საკრებულოში მუშაობისთვის“ -ამბობს ახმედ იმამკულიევი

იმამკულიევმა მოსალოდნელ ცვლილებებთან დაკავშირებითაც ისაუბრა და განმარტა, რომ მმართველი პარტიის მიერ შემოთავაზებული პაკეტი ნაწილობრივ მისაღებია. „ევროპული საქართველოს“ წევრისათვის მიუღებელია ცვლილება, რომლის მიხედვითაც პოლიტიკურ პარტიებს ოპონენტის ანტირეკლამაზე შეზღუდვები დაუწესდა და ანტირეკლამის ნაწილად სარეკლამო რგოლის 25% განისაზღვრა.

„ეს არის ჩემთვის მიუღებელი იქედან გამომდინარე, რომ იმ პოლიტიკურ ძალებს, რომლებსაც სურს რაიმე პოლიტიკური რეკლამის განთავსება, იქნება ეს მეორე მხრის ანტირეკლამა თუ თავის ქება, ეს არის მათთვის კონსტიტუციით მინიჭებული სიტყვისა და გამოხატვის თავისუფლების უფლება. ეს არის ბიძინა ივანიშვილის ხუშტურები. მას სურს რომ გააკონტროლოს თავისუფალი მედია და გააკონტროლოს სიტყვის თავისუფლება“ - განაცხადა ახმედ იმამკულიევმა

იმამკულიევის თქმით, მისთვის მისაღებია 2020 წლის არჩევნებისათვის მთავარი მიღწევა, პროპორციული სისტემის შემოღება, რომელიც საზოგადოებამ აქციების ფონზე მოიპოვა.

რადიო „მარნეული“

ავტორი:

ვლადიმერ ჩხიტუნიძე