10 თვის მონაცემებით, ნებართვით 282 855.4 კუბური მეტრი ხე მოიჭრა, 7241 კუბური მეტრი კი უკანონოდ არის მოჭრილი
2019 წლის 10 თვის მონაცემებით, ჯამში გაცემული ნებართვით 282 855.4 კუბური მეტრი ხეა მოჭრილი. მათ შორის: სხვადასხვა ინფრასტრუქტურული საჭიროების გამო 57 742.6 კუბური მეტრი ხე; სოციალური საჭიროებისთვის 219 251.5 კუბური მეტრი ხე; 5861.3 კუბური მეტრი ხე კი სანიტარული მიზნით მოიჭრა.

როგორც „ინტერპრესნიუსს“ „ეროვნული სატყეო სააგენტოში“ გამოთხოვნილ ინფორმაციაზე უპასუხეს, 2018 წელს ჯამში ნებართვით, 433 475.9 კუბური მეტრი ხე არის მოჭრილი. 2017 წელს კი - 466 393.5 კუბური მეტრი.

რაც შეეხება ხე-ტყის უკანონო ჭრის ფაქტებს, როგორც „ინტერპრესნიუსს“ გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტში განუცხადეს, 2019 წლის 1-ლი იანვრიდან-დღემდე ხე-ტყის უკანონო მოჭრის 1429 ფაქტია გამოვლენილი. მათ შორის: ადმინისტრაციული სამართალდარღვევის 1267 ფაქტი, ხოლო სისხლის სამართლის ნიშნების მქონე 162 ფაქტი.

ყველაზე მეტი 619 ფაქტი გამოვლენილია კახეთის რეგიონში, ყველაზე ნაკლები 20 კი რაჭა-ლეჩხუმსა და ქვემო სვანეთში.

რაც შეეხება თავად უკანონოდ მოპოვებული ხე-ტყის მოცულობას, გარემოსდაცვითი ზედამხედველობის სამსახურის ინფორმაციის თანახმად, მთელი ქვეყნის მასშტაბით, 2019 წლის 10 თვის განმავლობაში, ჯამში 7241 კუბური მეტრი ხე-ტყის უკანონოდ მოჭრის ფაქტია დაფიქსირებული.

ყველაზე მეტი 3261 კუბური მეტრი ხე-ტყის უკანონო მოპოვების ფაქტი, გარემოსდაცვითი ზედამხედველობის სამსახურმა სამეგრელო-ზემო სვანეთის რეგიონში გამოავლინეს. 1042 კუბური მეტრი ხე-ტყე უკანონოდ კახეთის რეგიონში მოჭრეს. ყველაზე ცოტა, 91 კუბური მეტრი ხე-ტყე უკანონოდ კი რაჭა-ლეჩხუმსა და ქვემო სვანეთის რეგიონში მოჭრეს.

წყარო: ინტერპრესნიუსი
Print