საქართველოში მოქმედი 13 ბიზნესასოციაცია ხელისუფლებას მიმართავს და კრიზისიდან გამოსვლის 6-პუნქტიან გეგმას სთავაზობს.

ბიზნესაცოციაციები მიმართვაში შეშფოთებას გამოხატავენ მთავრობის ქმედებების გამო – ლოქდაუნის ჯერ 16 იანვარს ნაწილობრივი, შემდეგ კი 1-ლ თებერვალს მოხსნის თაობაზე.

მათი განცხადებით, კვლავ კითხვის ნიშნის ქვეშაა გაიხსნება თუ არა ქვეყანა პირველ თებერვალს. მეტიც, სხვადასხვა სამინისტროების ხელმძღვანელები და ეპიდემიოლოგები მესამე ტალღასა და კიდევ ერთ ლოქდაუნზე ლაპარაკობენ.

“ქვეყანა დგას გადარჩენის ან მთლიანი დაღუპვის ზღვარზე. გაკოტრებულია არაერთი დარგი, რის გამოც სავალალო მდგომარეობაშია საგადასახადო სისტემა და საბანკო სექტორიც კი. სუფევს ტოტალური უმუშევრობა (გარდა სახელმწიფო უწყებებისა)“, – ნათქვამია განცხადებაში.

მათი თქმით, იმისთვის, რომ ქვეყანამ საფინანსო ვალდებულებები შეასრულოს, ერთადერთი გარანტი ბიზნესის ყველა სექტორის ამოქმედებაა, რისთვისაც შეზღუდვების დაუყოვნებელი მოხსნა და ფრენების აღდგენაა საჭირო.

ბიზნესასოციაციები ქვეყნის ეკონიმიკის გადარჩენის მიზნით, საქართველოს მთავრობას შემდეგ გეგმას სთავაზობენ:

• სასწრაფოდ ამუშავდეს ტრანსპორტი, როგორც საქალაქო, ასევე საქალაქთაშორისო, საავტომობილო, მეტრო და რკინიგზა (კონცენტრაციის მინიმიზაციის გათვალისწინებით). გაჩერებული ტრანსპორტი მიზეზია დღეს გაზრდილი უმუშევრობის და წარმოადგენს დისკრიმინაციას ყველაზე დაბალშემოსავლიანი ფენების მიმართ;
• საერთაშორისო საავიაციო კომუნიკაციის აღდგენა. ავიღოთ მაგალითი ჩვენი მეზობელი ქვეყნებისაგან, რომლებსაც არ გაუჩერებიათ საერთაშორისო ტურისტული ბიზნესი და ამავდროულად წარმატებით ართმევენ თავს ეპიდემიასთან ბრძოლას.
• დაიწყოს ფუნქციონირება სარესტორნო ბიზნესმა (გაიდლაინის რეგულაციების გათვალისწინებით); სარესტორნო ბიზნესი ეპიდემიოლოგების მოთხოვნების დაცვის თვალსაზრისით ერთ-ერთი ყველაზე მობილიზებული ბიზნესია. ამ ბიზნესის დაკეტვა იწვევს აბსოლუტურად უკონტროლო ჩრდილოვანი ღონისძიებების და ქეიფების ჩატარებას კერძო სექტორის ტერიტორიებზე.
• შიდა და გარე ტურიზმისა მოთხოვნების გათვალისწინებით, ამუშავდეს სასტუმროები;
• აღდგეს მოლებისა და არასასურსათო მაღაზიების ოპერირება; ასეთი ამუშავების წარმატებული შედეგი უკვე გვაქვს ახალი წლის პერიოდში. როგორც დავინახეთ, ასეთ მუშაობას არ მოჰყოლია დაავადებულთა რიცხვის მატება.
• დაიწყოს ზამთრის კურორტების ოპერირება, როგორც სასტუმროების, ასევე საბაგირო გზების.

“ვიმედოვნებთ, რომ მთავრობა აცნობიერებს ქვეყნაში არსებულ რთულ მდგომარეობის სიმწვავეს, გაგებით მოეკიდება ჩვენს ინიციატივას და უახლოეს პერიოდში აამუშავებს ქვეყანას, რათა ცოტათი მაინც შეარბილოს უკვე ისედაც მძიმე მდგომარეობა“, – ნათქვამია განცხადებაში.