მარნეულში მომხდარ მკვლელობის ფაქტზე 3 პირი დააკავეს
მარნეულში მომხდარ მკვლელობის ფაქტზე, სამი პირია დაკავებული.
როგორც რადიო „მარნეულს“ შინაგან საქმეთა სამინისტროში განუცხადეს,
ორი პირი განძრახ მკვლელობის მუხლით, ხოლო ერთი დანაშაულის
შეუტყობინებლობისთვის დააკავეს.
“შინაგან საქმეთა სამინისტროს ქვემო ქართლის პოლიციის დეპარტამენტის
თანამშრომლებმა, ჩატარებული ოპერატიულ-სამძებრო და საგამოძიებო
ღონისძიებების შედეგად, მარნეულის მუნიციპალიტეტში მომხდარ განზრახ
მკვლელობის ფაქტთან დაკავშირებით, წარსულში ნასამართლევი, 1992 წელს
დაბადებული ო.ტ., 1986 წელს დაბადებული ო.გ. და წარსულში
ნასამართლევი, 1981 წელს დაბადებული ს.ა. დააკავეს.
ო.ტ.-ს და ო.გ.-ს ბრალი ედებათ წინასწარი შეთანხმებით ჯგუფის მიერ
ჩადენილ თავისუფლების უკანონო აღკვეთასა და დამამძიმებელ გარემოებაში
ჯგუფურად ჩადენილ განზრახ მკვლელობაში, ხოლო ს.ა. -
სამართალდამცველებმა განსაკუთრებით მძიმე დანაშაულის შეუტყობინებლობის
ბრალდებით დააკავეს.
ო.ტ-ს და ო.გ.-ს მიერ ჩადენილი დანაშაული 7-დან 17 წლამდე ვადით, ხოლო
ს.ა.-ს მიერ ჩადენილი ქმედება 3-დან 7 წლამდე ვადით თავისუფლების
აღკვეთას ითვალისწინებს.
გამოძიებით დადგინდა, რომ ო.ტ.-მ და ო.გ. -მ მიმდინარე წლის 18
სექტემბერს, მარნეულის მუნიციპალიტეტში, შურისძიების მოტივით, ნაცნობს
- 1993 წელს დაბადებულ ჯ.ჩ.-ს ძალადობის გამოყენებით თავისუფლება
უკანონოდ აღუკვეთეს და ხელ-ფეხი შეუკრეს. შემდეგ ბრალდებულებმა
გაკოჭილი ჯ.ჩ., ო.გ.-ის მართვის ქვეშ არსებული ავტომობილით, მარნეულის
მუნიციპალიტეტის ერთ-ერთ სოფელში წაიყვანეს, სხეულზე მძიმე საგანი
მოაბეს და სარწყავ არხში გადააგდეს, რის შედეგადაც იგი
გარდაიცვალა.
გამოძიებით დადგინდა, რომ ო.ტ.-ს და ო.გ.-ს მიერ ჩადენილ ქმედებას
შეესწრო მათივე მეგობარი - ს.ა., თუმცა მან მომხდარი მძიმე დანაშაულის
შესახებ სამართალდამცველებს არ შეატყობინა.
საქმეზე ჩატარებული ინტენსიური სამძებრო და საგამოძიებო მოქმედებების
შედეგად, სამართალდამცველებმა სამივე ბრალდებული მარნეულში
დააკავეს.
წინასწარი შეთანხმებით ჯგუფის მიერ ჩადენილ თავისუფლების უკანონო
აღკვეთის, დამამძიმებელ გარემოებაში ჯგუფურად ჩადენილ განზრახ
მკვლელობისა და განსაკუთრებით მძიმე დანაშაულის შეუტყობინებლობის
ფაქტებზე გამოძიება საქართველოს სსკ-ის 143-ე მუხლის მე-3 ნაწილის "ა"
ქვეპუნქტით, 109-ე მუხლის მე-2 ნაწილის "ე" ქვეპუნქტით და 376-ე
მუხლის მე-2 ნაწილით მიმდინარეობს” - წერია შინაგან საქმეთა
სამინისტროს მიერ გავრცელებულ ინფორმაციაში.
გავრცელებული ინფორმაციის მიხედვით, გარდაცლილ პირი დმანისიდან იყო,
რომელიც მარნეული-დმანისის სამარშუტო ხაზზე მუშაობდა და მას სამი დღის
განმავლობაში ეძებდნენ.
ახალგაზრდა მამაკაცს ცხედარი მარნეულში მდინარე ალგეთთან იპოვეს.