ადამიანთა ჯგუფი ენმ-ის აქტივისტებს სამტრედიასთან ცოცხებით დახვდა
მიხეილ სააკაშვილის მხარდამჭერ აქციაზე დასასწრებად თბილისისკენ მომავალ მოქალაქეებს სამტრედიასთან ადამიანთა ჯგუფი დახვდა ცოცხებით ხელში. აღნიშნულის შესახებ ენმ-ის ზუგდიდის ორგანიზაციის ლიდერი ანი წითლიძე ფეისბუქზე წერს.

“სამტრედიასთან გააჩერეს კოლონები. გზა გადაგვიკეტეს. 30 კაცია ცოცხებით”,
— დასძენს წითლიძე.

ფეისბუკზე გავრცელებულ კადრებში ჩანს, რომ ხსენებული პირები შეურაცხმყოფელი შეძახილებით ხვდებიან ავტომანქანებს, რომლებშიც ოპოზიციის მხარდამჭერები სხედან. ადგილზე მობილიზებული იყო პოლიციაც.

შეკრების მონაწილეთაგან არაერთს ხელში ცოცხი ეკავა. ცოცხები ეყარა გზის სავალ ნაწილზეც. კადრებში ჩანს, რომ აღნიშნულის მიუხედავად, ავტოკოლონა გზას განაგრძობს.

წითლიძის თანახმად, შეკრებილთა შორის იყვნენ “ქართული ოცნების” სახეები ზუგდიდიდან. “ნეტგაზეთი” მათთან დაკავშირებას ცდილობს ინფორმაციის გადასამოწმებლად.

აქცია მიხეილ სააკაშვილის გათავისუფლების მოთხოვნით თბილისში 14 ოქტომბერს უნდა გაიმართოს. შეკრებას მოქალაქეები რეგიონებიდანაც უერთდებიან.

საქართველოს ყოფილი პრეზიდენტი მიხეილ სააკაშვილი პირველ ოქტომბერს საქართველოში დააკავეს. ის უკრაინიდან არალეგალური გზებით შემოვიდა.დაკავების შემდეგ სააკაშვილმა შიმშილობა დაიწყო და, როგორც ადვოკატები აცხადებენ, ამის გამო მისი ჯანმრთელობის მდგომარეობა რთულდება.

Print ელ. ფოსტა
FaceBook Twitter Google
მსგავსი სიახლეები
დაიცავი დისტანცია