Gürcüstan Maliyyə Nazirliyinin İstintaq Xidmətinin əməkdaşları
həyata keçirdikləri əməliyyat-istintaq tədbirləri və istintaq
hərəkətləri nəticəsində altı nəfəri saxta rəsmi sənədlərin
hazırlanması və satması faktında ittiham edib ki, bunlardan da üç
nəfər həbs edilib.
İstintaq Xidmətindən bm.ge-yə verilən məlumata görə, araşdırma
zamanı müəyyən edilib ki, təqsirləndirilən şəxslər 2019-2021-ci
illərdə qanunsuz maddi sərvət əldə etmək məqsədilə idarə etdikləri
şirkətlərin adından saxta əmək haqqı arayışları hazırlayaraq,
habelə müxtəlif mikromaliyyə təşkilatlarının saxta sənədləri
hazırlayaraq Gürcüstanın müxtəlif bank qurumlarından 58 vətəndaşın
adına qeyri-qanuni yollarla kredit götürüblər. Ümumi məbləğinin
milyon yarım laridən çox olduğu iddia edilir.
“Aparılmış istintaq hərəkətləri nəticəsində yüzlərlə
vətəndaşın adına hazırlanmış saxta sənədlər, habelə onların
hazırlanmasında istifadə olunan kompüter avadanlığı və müxtəlif
təşkilatlara məxsus saxta möhürlər götürülüb.
Faktla bağlı Gürcüstan Cinayət Məcəlləsinin 208-ci maddəsinin
birinci hissəsi və 362-ci maddəsinin ikinci hissəsi ilə istintaq
tədbirləri həyata keçirir ki, bununla da 3 ildən 6 ilədək
azadlıqdan məhrumetmə cəzası nəzərdə tutulub”, -
İstintaq Xidmətinin məlumatında deyilir.