ევროპის ქვეყნებში კორონავირუსის ომიკრონის შტამით გამოწვეული შემთხვევების მნიშვნელოვანი მატებაა, რაც CNN-ის თქმით, ზაფხულის ტურისტულ სეზონზე პანდემიის ახალი, გლობალური ტალღის საშიშროებას აჩენს.


გამოცემა წერს, რომ ევროპის დაავადებათა კონტროლის ცენტრი მოსახლეობას აფრთხილებს, რომ ევროკავშირის ქვეყნებში ომიკრონის BA.4 და BA.5 ვარიანტები დომინანტურად ცირკულირებს, რამაც შესაძლოა შემთხვევების რაოდენობა მკვეთრად გაზარდოს. CNN-ის თქმით, ინფიცირების მაჩვენებელი მზარდია რამდენიმე ქვეყანაში მათ შორის, პორტუგალიაში, გერმანიაში, საფრანგეთში, საბერძნეთში, ავსტრიაში, იტალიაში, შვეიცარიასა და ესპანეთში.

ახალი კვლევების მიხედვით, ომიკრონის BA.4 და BA.5 ქვეშტამებს წინამორბედებზე მაღალი გავრცელების მაჩვენებელი აქვს, რამდენადაც ისინი უკეთ აღწევენ თავს ორგანიზმის იმუნურ სისტემას. CNN განმარტავს, რომ შესაბამისად, არც გადატანილი ინფექცია და არც ჩატარებული ვაქცინაცია ძლიერ დაცვას არ უზრუნველყოფს აღნიშნული ქვეშტამების წინააღმდეგ.

მიუხედავად ამისა, გამოცემა აღნიშნავს რომ BA.4 და BA.5 ქვეშტამები წინა ვარიანტებთან შედარებით, დაავადების უფრო მძიმე მიმდინარეობას არ იწვევს, თუმცა სფეროს ექსპერტები აღნიშნავენ, რომ ფართო გავრცელების შემთხვევაში შესაძლოა ჯანდაცვის სისტემები კვლავ გადაიტვირთოს.

პორტუგალიაში, სადაც ომიკრონის ახალი ქვეშტამების ყველაზე მეტი შემთხვევაა დაფიქსირებული, მილიონ მოსახლეზე ინფიცირების საშუალო დღიური მაჩვენებელი 1 332-ია. საფრანგეთში კი მილიონ მოსახლეზე ინფიცირების მაჩვენებელი თვის დასაწყისთან შედარებით, სამჯერაა გაზრდილი. ჰოსპიტალიზების მაჩვენებელი კი აპრილის შემდეგ პირველად იზრდება. საფრანგეთის ჯანდაცვის უწყებები მოუწოდებენ 60 წელზე მეტი ასაკის მოქალაქეებს ვაქცინის ბუსტერ დოზა რაც შეიძლება მალე გაიკეთონ.

რაც შეეხება დიდ ბრიტანეთს, სადაც ჰოსპიტალიზაციის მაჩვენებელი მკვეთრად იზრდება. იქაც, შემთხვევების მატებას ომიკრონის ახალი ქვეშტამებით ხსნიან. აშშ-ს დაავადებათა კონტროლის ცენტრის ბოლო მონაცემებით ქვეყანაში კორონავირუსის შემთხვევების მესამედი სწორედ BA.4 და BA.5 ქვეშტამებზე მოდის მომდევნო კვირებში კი აღნიშნული ვარიანტების დომინანტ შტამად ქცევას პროგნოზირებენ.