რუსეთის პრეზიდენტის, ვლადიმერ პუტინის მიერ უკრაინაში ბირთვული იარაღის გამოყენების რისკი შემცირდა საერთაშორისო ზეწოლის შედეგად, – ამის შესახებ გერმანიის კანცლერმა, ოლაფ შოლცმა Funke Media-სთვის მიცემულ ინტერვიუში განაცხადა.

შოლცი ამბობს, რომ ომი გრძელდება ისევ ისეთი სისასტიკით, თუმცა ამჟამად ერთი რამ შეიცვალა.

„რუსეთმა შეწყვიტა ბირთვული იარაღის გამოყენების მუქარა იმის პასუხად, რომ საერთაშორისო საზოგადოებამ გაავლო წითელი ხაზი“, – განაცხადა გერმანიის კანცლერმა.

ამასთან, გერმანიის ლიდერი ამბობს, რომ ღრმა უთანხმოებების მიუხედავად, კრემლთან დიალოგის გაგრძელება მნიშვნელოვანია. Funke Media-ს ცნობით, შოლცთან ინტერვიუ 5 დეკემბერს ჩაიწერა.

ამასთან, თავის მხრივ, ვლადიმერ პუტინმა 7 დეკემბერს განაცხადა, რომ ბირთვული ომის საფრთხე იზრდება, თუმცა აღნიშნა, რომ რუსეთი არავითარ გარემოებაში არ გამოიყენებს მას პირველი. მისი თქმით, რუსეთი ბირთვულ იარაღს განიხილავს, როგორც თავდაცვის საშაუალებას.

„ჩვენ არ გავგიჟებულვართ, ვაცნობიერებთ, რა არის ბირთვული იარაღი“, – განაცხადა რუსეთის პრეზიდენტმა.

უკრაინის დახმარებაზე საუბრისას, კანცლერმა განაცხადა, რომ აშშ-ის შემდეგ გერმანია არის უკრაინის უდიდესი მხარდამჭერი, იარაღის მიწოდების ჩათვლით.

„ჩვენ ვაკეთებთ ყველაფერს, რაც შეგვიძლია, რათა თავიდან ავიცილოთ პირდაპირი ომი რუსეთსა და ნატო-ს შორის. ასეთ კონფლიქტს მხოლოდ წაგებულები ეყოლება მთელ მსოფლიოში“, – განაცხადა გერმანიის კანცლერმა.