„ჩემს პირობას ვასრულებ... დავტოვებ პარტიას და თანამდებობას“ - „ოცნების“ წევრი თელავიდან
თელავის მუნიციპალიტეტის საკრებულოს დეპუტატი, პარტია "ქართული ოცნების" წევრი ლევან ბერძენაშვილი ე.წ. "აგენტების კანონის" მიღების გამო პარტიას და საკრებულოში დაკავებულ თანამდებობას დატოვებს. ბერძენაშვილი წარმომადგენლობით ორგანოში სამანდატო, საპროცედურო და იურიდიული საკითხთა კომისიას ხელმძღვანელობს.

როგორც ლევან ბერძენაშვილმა რადიო თავისუფლებას უთხრა, მიმდინარე წლის 10 ივნისამდე შვებულებაშია, საკრებულოში დაბრუნებისთანავე კი "ქართულ ოცნებას“ და საკრებულოში თანამდებობას დატოვებს.

„მე რაც ვთქვი, ჩემს სიტყვას ბოლომდე
შევასრულებ. ეს არის პროტესტი კანონზე, რომელიც პარლამენტმა მიიღო.“

ბერძენაშვილმა მიმდინარე წლის 26 აპრილს საკრებულოს სხდომაზე „ფიცი დადო“, რომ თუ მმართველი გუნდი "უცხოური გავლენის გამჭვირვალობის კანონს" უკან არ გაიწვევდა, დატოვებდა პარტიას და თანამდებობას.

"ევროკავშირის წევრი ქვეყნები, ყველა პარტნიორი გვეუბნება, რომ თუ ამ კანონს მიიღებთ, შესაძლოა დაკარგოთ ვიზალიბერალიზაცია, კანდიდატის სტატუსი, დაკარგავთ ყველაფერს, რაც ევროპას უკავშირდება... ამიტომ მე ამ კანონპროექტს ვემიჯნები და თქვენს წინაშე ვდებ ფიცს, თუ პროექტს უკან არ გაიწვევენ, მე დავტოვებ თანამდებობას“, - ასე მიმართა ბერძენაშვილმა აპრილში საკრებულოს წევრებს.

ბერძენაშვილი ამ განცხადების გაკეთებამდე სოციალურ ქსელ ფეისბუკში აზიარებდა მმართველი პარტიის დეპუტატის, დიმიტრი სამხარაძის პოსტებს, რომლებშიც ეწერა, რომ ე.წ. აგენტების კანონპროექტი არა რუსული, არამედ ევროპული იყო.


წყარო: radiotavisupleba.ge

„ქართული ოცნება“ კიდე ერთხელ აპირებს რუსული კანონის მიღებას, რომელიც 2023 წლის მარტში მასობრივი პროტესტის შედეგად უკან გაიწვიეს. „ქართულმა ოცნებამ“ გასულ წელს დადო პირობა, რომ რუსულ კანონს აღარ დაუბრუნდებოდნენ, მაგრამ პირობა დაარღვია. ქართულმა ოცნებამ კანონპროექტის პირვანდელი ფორმულირებიდან მხოლოდ სიტყვა "აგენტი" ამოიღო და ის უცხოური ძალის ინტერესების გამტარებლით შეცვალა.
კანონის მიხედვით, ყველა არასამთავრობო და მედიაორგანიზაცია, რომლის შემოსავლების 20%-ზე მეტი უცხოეთიდან არის მიღებული უცხოური ძალია ინტერესების გამტარებლად ჩაითვლება. სახელმწიფო არ გამოიკვლევს თუ რას საქმიანობენ და რა მიზნებს ემსახურებიან ეს ორგანიზაციები და მათ ყველას უცხოური ძალის ინტერესის გამტარებლად შერაცხავს.
კანონი მიმართულია ევროპასა და ამერიკისაგან შემოსულ დაფინანსებებზე და არა მტრულად განწყობილი ქვეყნებიდან შემოსულ დაფინანსებებზე, როგორც ეს ცივილიზებულ ქვეყნებშია.
კანონის ინიცირების გამო შეშფოთება გამოთქვეს ევროკავშირის წევრმა და საქართველოს მეგობარი ქვეყნების ლიდერებმა, რუსეთის პრეზიდენტის პრესმდივანმა კი „ქართული ოცნების“ კანონი მოიწონა.
Print ელ. ფოსტა
FaceBook Twitter Google
მსგავსი სიახლეები