საერთაშორისო სავალუტო ფონდის (IMF-ის) უახლესი პროგნოზით, 2025 წელს საქართველოში 6%-იანი ეკონომიკური ზრდა იქნება, მსოფლიო ბანკს კი მთლიანი შიდა პროდუქტის 5.5%-ით ზრდის მოლოდინი აქვს.

IMF-ს მსოფლიო ეკონომიკური პროგნოზის (WEO) ბოლო, 25 აპრილის კვარტალური ანგარიშის თანახმად, 2025 წელს საქართველოს ეკონომიკური ზრდის ტემპი წინა სამი წლის მაჩვენებელთან შედარებით შემცირდება, თუმცა ეკონომიკა კვლავ გაიზრდება - 6%-ით.

ზრდის ტემპი მცირდება მსოფლიო ბანკის განახლებული მონაცემებითაც - მსოფლიო ბანკის მოლოდინით, მთლიანი შიდა პროდუქტის ზრდა 5.5% იქნება.

ორივე წყაროს თანახმად, მომდევნო, 2026 წელს ეკონომიკური ზრდის საპროგნოზო მაჩვენებელი 5%-ია.

საქსტატის მონაცემებით:

• 2020 წელს კორონავირუსის პანდემიის გამო საქართველოს 6.3%-იანი რეცესია ჰქონდა.
• 2021 წელს, მსოფლიოში პოსტკოვიდური აღდგენის პირობებში, ქვეყნის ეკონომიკა 10.6%-ით გაიზარდა.
• 2022 წელს, უკრაინაში რუსეთის ფედერაციის სრულმასშტაბიანი შეჭრისა და სავაჭრო ნაკადების ნაწილობრივ გადაწყობის, ასევე, რუსეთის მოქალაქეების მიგრაციისა და კაპიტალის შემოდინების ფონზე, საქართველოს ეკონომიკა 11%-ით გაიზარდა.
• 2023 წელს ეკონომიკამ ზრდა განაგრძო - 7.8%-ით.
• 2024 წელს ზრდის ტემპი კვლავ გაიზარდა - მშპ-ის ზრდამ 9.4% შეადგინა.
• თუმცა საქართველოს ეკონომიკა 2024 წლის ნოემბერ-დეკემბერში, წინა წელთან შედარებით, მხოლოდ 7.5 და 6.7%-ით გაიზარდა. ეს ნიშნავს, რომ 2024 წლის ბოლოს - ანტისამთავრობო საპროტესტო დემონსტრაციებისა და დასავლეთთან ურთიერთობების უკიდურესად დაძაბვის პარალელურად, - ეკონომიკური ზრდა შენელდა.

საქსტატის მონაცემებითვე, 2025 წლის პირველ ორ თვეში მშპ-ის საშუალო ზრდა 9.4%-ია. თუმცა ჯერ მხოლოდ ორი თვის მონაცემია ხელმისაწვდომი (მარტის წინასწარი მონაცემები მიმდინარე კვირაში გამოქვეყნდება). თვიური მონაცემები კი ასეთი იყო:

• იანვარი - 11.1%
• თებერვალი - 7.7%

IMF-ს წინა კვარტალურ ანგარიშში 2025 წლისათვის გლობალური ეკონომიკური ზრდის პროგნოზი 3.3%-ზე ჰქონდა ფიქსირებული, ახლა კი 2.8%-მდე შეამცირა.

IMF-ისა და მსოფლიო ბანკის პროგნოზებითვე, ეკონომიკური ზრდის ტემპის შენელებაა მოსალოდნელი საქართველოს მეზობელ სომხეთის რესპუბლიკაშიც.

მსოფლიო ბანკი სომხეთის შემთხვევაში 2025 წელს მხოლოდ 4%-იან ეკონომიკურ ზრდას პროგნოზირებს, IMF-ი კი - 4.5%-ს.

სხვა მეზობელ ქვეყნებში 2025 წელს მოსალოდნელი ეკონომიკური ზრდის პროგნოზი კი, IMF-ის თანახმად, ასეთია:

• აზერბაიჯანი - 3.5%
• თურქეთი - 2.7%
• რუსეთი - 1.5%