საქართველოს პროკურატურის 2024 წლის ანგარიშის მიხედვით, გასულ წელს საქართველოში საპროცესო შეთანხმებისას დაკისრებული ფულადი ჯარიმების რაოდენობამ უპრეცედენტოდ მაღალ ნიშნულს მიაღწია - მიუხედავად იმისა, რომ გასულ წელთან შედარებით საპროცესო შეთანხმებისას სასჯელის სახით ჯარიმის გამოყენების პროცენტული მაჩვენებელი არ გაზრდილა, ჯარიმის სახით გადახდილი თანხების ოდენობა 6 მილიონ ლარზე მეტით აღემატება 2024 წლის მონაცემს.


ამავე ანგარიშის მიხედვით, 2024 წელს:

• საპროცესო შეთანხმებისას საზოგადოებისთვის სასარგებლო შრომის სასჯელის სახით გამოყენების მაჩვენებელი 16,8% იყო, რაც წინა წლებთან შედარებით გაზრდილი მაჩვენებელია. 2021-2023 წლებში ეს რიცხვი 15,8%-ზე მაღალი არ ყოფილა.
• სასჯელაღსრულების დაწესებულებაში მოხდით თავისუფლების აღკვეთის გამოყენების მაჩვენებელი 19% იყო - წინა წლებთან შედარებით ესეც გაზრდილი მაჩვენებელია. 2020-2024 წლებში ყველაზე მაღალი ეს მაჩვენებელი 18,1% იყო.
• გაზრდილია საპროცესო შეთანხმების საფუძველზე არასრულწლოვანის მიმართ სასჯელაღსრულების დაწესებულებაში მოხდით თავისუფლების აღკვეთის გამოყენება, რაც ბოლო 5 წლის განმავლობაში ყველაზე მაღალი მაჩვენებელია - გასულ წელს თავისუფლების აღკვეთა არასრულწლოვანებისთვის გამოყენებული იქნა 29,4%-ში. 2023 წელს ეს რიცხვი 15,2% იყო, 2022 წელს - 19,4%.

2024 წლის დეკემბრის მდგომარეობით, სპეციალურ პენიტენციურ დაწესებულებებში მოთავსებული იყო 9098 ბრალდებული და მსჯავრდადებული პირი, მათ შორის 396 ქალი - პატიმართა რაოდენობა გასულ წელს ყველაზე ახლოს არის 2013 წლის მაჩვენებელთან - ყველა დანარჩენ წელს, "ქართული ოცნების" ხელისუფლებაში ყოფნის დროს, პატიმართა რაოდენობა 9100-ს აჭარბებდა, თუმცა 10 400-ს არ აღემატებოდა.