უკრაინის პრეზიდენტს, ვოლოდიმირ ზელენსკის ანგარიში ჩააბარა უკრაინის უსაფრთხოების სამსახურის [СБУ] უფროსმა, ვასილი მალიუკმა, რომელიც გეგმავდა და ხელმძღვანელობდა რუსეთის აეროდრომებზე დრონების მასშტაბური შეტევის ოპერაციას.

“ბრწყინვალე შედეგი” - აღნიშნავს თავის ფეისბუკგვერდზე უკრაინის პრეზიდენტი, რომელიც, ოფიციალური ინფორმაციით, ოპერაცია "ობობას ქსელის" მზადებასა და მიმდინარეობას პირადად აკონტროლებდა.

„ერთი წელი ექვსი თვე და ცხრა დღე - დაგეგმვის დაწყებიდან ეფექტურ განხორციელებამდე. ჩვენი ყველაზე შორი

მოქმედების ოპერაცია. ჩვენი ხალხი, რომლებიც ამზადებდნენ ამ ოპერაციას დროულად გამოვიყვანეთ რუსეთის ტერიტორიიდან. მადლობა გადავუხადე გენერალ ვასილი მალიუკს უკრაინის ამ წარმატებისთვის“, - წერს პრეზიდენტი ზელენსკი, რომელმაც, როგორც აღნიშნა - გენერალს დაავალა ოპერაციის დეტალების საზოგადოებისთვის გაცნობა და იქვე დაამატა:

„რა თქმა უნდა, ყველაფრის მოყოლა ახლა არ შეგვიძლია, მაგრამ უკრაინის ეს ქმედებები ნამდვილად მოხვდება ისტორიის სახელმძღვანელოებში. უკრაინა თავს იცავს და სრულიად სამართლიანად - ჩვენ ვაკეთებთ ყველაფერს, რათა რუსეთმა იგრძნოს ამ ომის დამთავრების აუცილებლობა. რუსეთმა დაიწყო ეს ომი და რუსეთმა უნდა დაასრულოს. დიდება უკრაინას“.

უკრაინის უსაფრთხოების სამსახურის [СБУ] ინფორმაციით, აეროდრომებზე შეტევის შედეგად დაზიანდა რუსეთის სტრატეგიული ავიაპარკის მესამედზე მეტი და ზარალმა 7 მილიარდი დოლარი შეადგინა.

„ასეთია საორიენტაციო ფასი მტრის სტრატეგიული ავიაციისა, რომელიც დაზიანდა СБУ-ს სპეცოპერაცია - „ობობას ქსელის“ შედეგად. დაზიანდა ფრთოსანი რაკეტების სტრატეგიული მზიდავების 34%, რუსეთის ფედერაციის ძირითად აეროდრომებზე“, - აღნიშნავს უსაფრთხოების სამსახურის პრესსამსახური.

რუსეთის თავდაცვის სამინისტრომ დაადასტურა ინფორმაცია აეროდრომებზე უკრაინული დრონებით შეტევის შესახებ და მომხდარს ტერორისტული აქტები უწოდა. თავდაცვის უწყების ტელეგრამ-არხზე გამოქვეყნებული განცხადების თანახმად, უკრაინულმა მხარემ FPV-დრონებით შეუტია რუსეთის ხუთ ოლქს. თავდაცვის უწყების ჩამონათვალშია ამურის ოლქიც, გარდა - ირკუტსკის, მურმანსკის, რიაზანისა და ივანოვის ოლქებისა, რომელთა შესახებაც ინფორმაცია თავიდანვე ვრცელდებოდა.

რუსეთის თავდაცვის სამინისტრო აცხადებს, რომ ივანოვის, რიაზანისა და ამურის ოლქებში შეტევა მოგერიებულ იქნა, ხოლო მურმანსკისა და ირკუტსკის ოლქებში - დაიწვა “საავიაციო ტექნიკის რამდენიმე ერთეული”.

„დრონები ააფრინეს ამ აეროდრომებთან ახლოს მდებარე ტერიტორიებიდან“, „მსხვერპლი არ არის“, „ტერაქტის ზოგიერთი მონაწილე დაკავებულია“, - ვრცელდება ინფორმაცია თავდაცვის სამინისტროზე დაყრდნობით.

ინფორმაციით, რომელიც მანამდე უკრაინული უსაფრთხოების სამსახურზე [СБУ] დაყრდნობით გავრცელდა, რუსეთის სტრატეგიული ავიაციის პარკიდან დაზიანდა 41თვითმფრინავი, მათ შორის - А-50, ТU-95, და ТU-22 М3.

უკრაინის უსაფრთხოების სამსახურში [СБУ] მედიას დილითვე დაუდასტურეს, რომ თავდასხმის სამიზნე იყო ერთბაშად ოთხი აეროდრომი რუსეთის ტერიტორიაზე: „ბელაია“ ["Белая"], „დიაგილევო“ ["Дягилево"] ,ოლენია“ ["Оленья"] და „ივანოვო“ ["Иваново"].