ინტერნეტ სივრცეში სოკარის ბრენდს ამოფარებული თაღლითები გამოჩნდნენ. ამის შესახებ report.ge-ს კომპანის "სოკარიდან" აცნობეს. მათი განმარტებით, „კომპანია „სოკარის“ სახელით ინტერნეტ სივრცეში გავრცელდა ცრუ ინფორმაცია, თითქოს „სოკარი“ მოქალაქეებს მოუწოდებს, განახორციელონ ინვესტიცია და სანაცვლოდ, თვეში კონკრეტული ოდენობის თანხას მიიღებენ. აღნიშნული ინფორმაცია რამდენიმე სოციალურ ქსელში დასპონსორებული პოსტის სახითაც ჩნდება.

"გავრცელებული ინფორმაცია არის ტყუილი და თაღლითური სქემის ნაწილი, რომლითაც დაუდგენელი პირები ცდილობენ, მოქალაქეებს თანხები მოტყუებით გამოსძალონ. საქართველოში ოპერირების არც ერთ ეტაპზე „სოკარს“ მომხმარებლისთვის არ შეუთავაზებია კომპანიაში ინვესტიციის განხორციელება. ვიდეო და ბმულზე გამოქვეყნებული ინფორმაცია არ ასახავს კომპანიის პოზიციას და არ შეესაბამება სიმართლეს. მეტიც,⚠ www.socar-ge.toinvest.pro ⚠ არ არის „სოკარის“ ოფიციალური ვებ-გვერდი და კომპანიას მასთან არანაირი კვეთა არ აქვს," - განუცხადეს report.ge-ს კომპანიაში.

კომპანია „სოკარის“ გარდა, გავრცელებულ ინფორმაციაში გამოყენებულია მუსიკოს ნინო ქათამაძის სახელიც. იმას, რომ თაღლითურ სქემასთან არავითარი კავშირი არ აქვს, ადასტურებს თავად ნინო ქათამაძეც.

„ამ ინფორმაციის გავრცელებით, ვიღაც ცდილობს, ჩემი სახელით საზოგადოება შეცდომაში შეიყვანოს. ამ სტატიაში აღნიშნული ინფორმაცია ტყუილია. არასდროს, ჩემი პროფესიის გარდა, სხვა საქმიანობით შემოსავალი არ მიმიღია. არასდროს მომიწოდებია ვინმესთვის, რომელიმე კომპანიაში ინვესტიცია განეხორციელებინა. “სოკარისა” და ჩემი სახელის გამოყენება იმისთვის, რომ მოქალაქეებს სადღაც თანხები გადაარიცხინონ, არის აშკარად თაღლითობა,“ - აცხადებს ნინო ქათამაძე.

„სოკარი“ მომხმარებელს მოუწოდებს, არ გახდნენ თაღლითური სქემის მსხვერპლნი და არ გადაურიცხოთ მცირედი თანხაც კი თქვენთვის უცნობ ადამიანებსა თუ იურიდიულ პირებს.