2024 წლის ოქტომბერში, გასული წლის იმავე თვეთან შედარებით, ავტომობილებთან დაკავშირებული მომსახურებების დიდი ნაწილი გაძვირდა, ნაწილი კი გაიაფდა.

ოქტომბერში წლიურად ყველაზე მეტად გაძვირებულია ავტომობილების რეცხვა. საქსტატის მონაცემების თანახმად, ფასები 16.8%-ით არის გაზრდილი.

ამავდროულად, 6.7%-ით არის გაზრდილი ზეთისა და ფილტრების შეცვლის ფასი. ავტომობილების შეკეთების მომსახურება კი 3.8%-ით გაძვირდა.

საანგარიშო პერიოდში აკუმულატორის ფასები გაიზარდა 5.4%-ით, საბურავების ღირებულება კი 5.3%-ითაა შემცირებული. ამასთანავე, წლიურად გაიაფდა სათადარიგო ნაწილები, ამ შემთხვევაში ფასის ცვლილებამ 2.6% შეადგინა.

საქსტატის მონაცემების მიხედვით, გაზრდილია როგორც ახალი, ასევე მეორეული ავტომობილების ფასებიც. ახლის შემთხვევაში ღირებულება 1.5%-ით გაიზარდა, მეორეულის კი, 2.7%-ით.

აღსანიშნავია, რომ 2024 წლის ოქტომბერში წინა თვესთან შედარებით ინფლაციის დონემ საქართველოში 0.3 პროცენტი, ხოლო წლიური ინფლაციის დონემ ასევე 0.3 პროცენტი შეადგინა.