„1+4 საგანმანათლებლო პროგრამის“ მოსარგებლე პირებისთვის სახელმწიფო უწყებებში, ადგილობრივ თვითმმართველობის ორგანოებსა და სხვა საჯარო სამსახურებში ექვსთვიანი სტაჟირების პროგრამა გამოცხადდა. რომლის მიზანია ახალგაზრდების დასაქმებას და სამოქალაქო ინტეგრაციის ხელშეწყობა.
როგორც რადიო „მარნეულს“ შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის სამოქალაქო ინტეგრაციის სამმართველოს უფროსმა, ელისო ლომიძემ განუცხადა, პროგრამა თავდაპირველად საპილოტე რეჟიმში განხორციელდა. ახლა მსურველთა რაოდენობამ იმატა.



„სწორედ საპილოტე პროგრამის პოზიტიური შედეგები და მსურველთა რაოდენობა გახდა მიზეზი იმისა, რომ გვეფიქრა პროგრამის ინსტუტიციონალიზაციაზე, რაც გასული წლის ბოლოს განხორციელდა. ცვლილება შევიდა მთავრობის დადგენილებაში. განხორციელებული ცვლილების თანახმად კი სიახლე არის ის, რომ სტაჟირება ცხადდება წელიწადში უკვე ორჯერ“- ამბობს ელისო ლომიძე

პროგრამის ფარგლებში ეთნიკური უმცირესობების წარმომადგენლებს შესაძლებლობა აქვთ კონკურსის საფუძველზე ჩაერთონ სტაჟირებაში. მათ სპეციალურად შექმნილი კომისია შეარჩევს.

„წარმატებული აპლიკანტები სტაჟრება გაივლიან სახელმწიფო უწყებებში, ადგილობრივ თვითმმართველობებსა და საჯარო სამართლის იურიდიულ პირებში. ინფორმაცია სტაჟირების პროგრამასთან დაკავშირებით განთავსებულია სახელწიფო მინისტრის აპარატის ვებგვერდზე. პირველ რიგში აუცილებელია რეგისტრაცია გაიარონ საჯარო სამსახურის ბიუროს ვებ გვერდზე და შეავსონ განაცხადი. მათ შორის არსებითი მნიშვვნელობა ენიჭება სამოტივაციო წერილს, სადაც აპლიკანტმა უნდა აღნიშნოს, რომელ სტრუქტურაში სურს სტაჟირების გავლა, ასევე ნათლად და არგუმენტირებულად უნდა დაასახელოს მათი მოტივაცია.- ამბობს ელისო ლომიძე



პროგრამა 6 თვიანია და მასში მონაწილეობის უფლება აქვთ ბაკალავრებს, მესამე და მეოთხე კურსზე მყოფ სტუდენტებს და ასევე, მაგისტრებს.
სტაჟირების პროგრამაში მონაწილეობისათვის მსურველებმა განაცხადის ფორმა 22 ოქტომბრამდე უნდა შეავსონ. პროგრამა "ქართულ ენაში მომზადების საგანმანათლებლო პროგრამით" (1+4 პროგრამით) მოსარგებლე 500 სტუდენტზეა გათვლილი.

შეგახსენებთ, რომ „1+4 საგანმანათლებო პროგრამა“ ითვალისწინებს აფხაზურ, ოსურ, სომხურ და აზერბაიჯანულ ენებზე ზოგადი უნარების გამოცდის ჩაბარებასა და უმაღლესი განათლების მიღების შესაძლებლობას. ახალგაზრდები ერთი წლის განმავლობაში გადიან ქართულ ენაში მომზადების საგანმანათლებლო კურსს, რის შემდგომაც სწავლას მათთვის სასურველ ფაკულტეტზე აგრძელებენ.