არჩევნების გაყალბებაში ბრალდებული როვშან და ეთიბარ ისკანდაროვების მორიგი სასამართლო სხდომა 17 მარტს, 15:00 საათზე, გაიმართება. სასამართლოში ამ ეტაპზე ბრალდების მხარის მტკიცებულებების გამოკვლევის ეტაპი მიმდინარეობს.

როვშან ისკანდაროვი მარნეულის საკრებულოს თავმჯდომარის მოადგილე იყო. ბრალდების მხარის მტკიცებით, მან და ეთიბარ ისკანდაროვმა 2024 წლის 26 ოქტომბერს, სადახლოში გახსნილ N69 საარჩევნო უბანში არჩევნების გაყალბება სცადეს. 26 ოქტომბერს გავრცელებულ ვიდეოში ჩანს, თუ როგორ ყრის საარჩევნო ბიულეტენების კონვერტებს როვშან ისკანდაროვი საარჩევნო ყუთში და მას ეთიბარ ისკანდაროვი ეხმარება.

როვშან და ეთიბარ ისკანდაროვები 31 ოქტომბერს დააკავეს. მათ აღკვეთის ღონისძიების სახით წინასწარი პატიმრობა აქვთ შეფარდებული.

ისკანდაროვებს ბრალი სისხლის სამართლის კოდექსის 164-ე ტერცია მუხლით აქვთ წარდგენილი, რაც არჩევნებთან დაკავშირებული დოკუმენტების: საარჩევნო სიების, ოქმების, ბიულეტენების, სარეგისტრაციო ჟურნალების და საკონტროლო ფურცლების განზრახ გაყალბებას გულისხმობს.

ამავე თემაზე: 
ვიდეოში ვნახე; ზურგით ვიდექი; არ ვიცი შიგნით რა იყო - რას ყვებიან მოწმეები როვშან ისკანდაროვის სასამართლოზე
მარნეულის საკრებულომ როვშან ისკანდაროვს უფლებამოსილება შეუჩერა
შსს-მ როვშან ისკანდაროვი არჩევნების გაყალბების ბრალდებით დააკავა