Dekabrın 12-də Azərbaycanın ümummilli lideri Heydər Əliyevin vəfatının 22-ci ildönümü ilə əlaqədar Gürcüstanda və Azərbaycanda anım mərasimləri keçirilib.

Azərbaycan Səfirliyinin nümayəndələri Tbilisi və Rustavidə mərhum liderin xatirəsini ehtiramla yad ediblər.

Səfirliyin məlumatına görə, dekabrın 12-də Tbilisi və Rustavi şəhərlərində Heydər Əliyevin adını daşıyan parklar və Kür çayının sağ sahilində yerləşən xatirə lövhəsi ziyarət edilib. Ziyarətdə Azərbaycan Respublikasının Gürcüstandakı Səfiri Faiq Quliyev, Dini Qurumlarla İş üzrə Dövlət Komitəsinin sədr müavini Sahib Nağıyev, Qafqaz Müsəlmanları İdarəsi sədrinin birinci müavini Hacı Salman Musayev, Azərbaycan İlahiyyat İnstitutunun rektoru Aqil Şirinov və onları müşayiət edən nümayəndə heyəti, həmçinin Gürcüstanın Azərbaycanlı İş Adamları Birliyinin (AZEBİ) idarə heyətinin sədri Nəriman Qurbanov, SOCAR-ın Gürcüstandakı nümayəndəliyinin rəhbərliyi, səfirlik əməkdaşları, iş adamları, icma və mətbuat nümayəndələri iştirak ediblər.

Ziyarət zamanı parklardakı abidələr və xatirə lövhəsi önünə gül dəstələri və əklillər qoyulub, Heydər Əliyevin xatirəsi ehtiramla yad edilib.

Eyni zamanda, Gürcüstanın Bakıda fəaliyyət göstərən səfiri Zurab Pataradze Heydər Əliyevin büstü önünə gül dəstələri qoyub. Azərbaycanın Fəxri Xiyabanında keçirilən mərasimdə səfir, moldovalı həmkarı ilə birlikdə Heydər Əliyevin və həyat yoldaşı Zərifə Əliyevanın məzarlarını ziyarət edərək gül dəstələri qoyub.

Dekabrın 12-də Azərbaycanda ümummilli lider Heydər Əliyevin anım günü qeyd olunur. Bu gün Azərbaycan lideri Heydər Əliyevin vəfatının 22-ci ildönümüdür.