"Gürcü Arzusu" hökumətinin Baş naziri İrakli Kobaxidze bu gün, fevralın 24-də əmək bazarının tədqiqatının təhlilinin nəticələrinin təqdimatını keçirib.

Kobaxidzenin izahına görə, tədqiqatın məqsədi dövlət universitetlərində əmək bazarının tələblərinə uyğun olaraq ixtisaslar üzrə kvotaların necə bölüşdürüləcəyini müəyyən etməkdir.

Tədqiqatı kim aparıb?
Tədqiqat İqtisadiyyat və Davamlı İnkişaf Nazirliyi tərəfindən Təhsil Nazirliyi ilə birlikdə həyata keçirilib. Prosesə Gürcüstan Biznes Assosiasiyası da cəlb olunub.
"Tədqiqatın düzgün metodologiya və düzgün yanaşma ilə aparılması üçün özəl sektorla əmək

daşlıq bizim üçün vacib idi", - deyə İrakli Kobaxidze bildirib.

Tədqiqatın metodologiyası
Kobaxidzenin sözlərinə görə, tədqiqatın metodologiyası ən yaxşı beynəlxalq təcrübəyə əsaslanır. Beynəlxalq Əmək Təşkilatı (BƏT), Avropa Təhsil Fondu və Peşə Təhsili İnkişafı üzrə Avropa Mərkəzi kimi təşkilatların təcrübəsindən istifadə olunub.

Təsadüfi seçim prinsipi ilə seçilmiş 12 500 müəssisə sorğuya cəlb edilib: 470 iri, 1 752 orta və 10 278 kiçik müəssisə. Sorğunun keçirilməsində Gürcüstan Milli Statistika Xidmətinin 153 müsahibəçisi iştirak edib. Tədqiqatın xəta payı 0,49% təşkil edir.

Paralel olaraq, 2025-ci ilin noyabr-dekabr aylarında dövlət sektorunda işçi qüvvəsinə tələbatla bağlı da tədqiqat aparılıb. Baş nazirin bildirdiyinə görə, bu tədqiqat "istisnasız olaraq bütün dövlət qurumlarını, təşkilatlarını və dövlət hüquqi şəxslərini" əhatə edib.

Nə öyrənilib?
Əmək bazarında sektorlar üzrə peşəkar bölgü - harada nə qədər insanın çalışdığı və sektorlar üzrə işçi qüvvəsinin əvəzlənməsi statistikası öyrənilib.

"Narahatedici uyğunsuzluqlar"
"Tələbələrin qəbul göstəriciləri ilə əmək bazarındakı tələbat arasında çox kəskin uyğunsuzluqlar var. Bir sıra ixtisaslar üzrə çox tez-tez ya kəskin kəsir, ya da əksinə, kəskin bolluq müşahidə olunur", - İrakli Kobaxidze deyib.

Peşə qrupları üzrə işçi qüvvəsinə beş illik tələbat da öyrənilib. Buraya Anakliya limanı layihəsi, Qara dəniz sualtı kabeli və Vaziani hava limanı kimi iri infrastruktur layihələri də daxil edilib.

Növbəti 5 ildə ali təhsilli nə qədər mütəxəssisə ehtiyac olacaq?
Tədqiqat göstərir ki, 64 095 ali təhsilli kadra ehtiyac olacaq. Onlardan 42 316 məzun özəl sektorda, 21 779-u isə dövlət sektorunda tələb olunacaq.

Ən çox tələb olunan peşələr bunlardır:

Orta məktəb müəllimləri

Satış və marketinq menecerləri

Tibb bacıları

Həkimlər

Tikinti menecerləri

Proqramçılar

Peşə təhsili müəllimləri

Tikinti nəzarətçiləri

Elektriklər

Təchizat və distributsiya menecerləri

Hansı ixtisaslar üzrə bolluq var?
Tədqiqata əsasən, ən çox bolluq hüquqşünaslar üzrədir.
"Dərinləşdirilmiş tədqiqatımız aşkar etdi ki, ildə orta hesabla əmək bazarına 678 hüquqşünasın daxil olmasına ehtiyacımız var. Yəni hər il tələbat 678 hüquqşünasdır, halbuki 3600 nəfər hüquq fakültəsinə qəbul olur və təxminən 2050 nəfər məzun olur."

"Biz faktiki olaraq tələbələri qurban verirdik ki, onlar konkret kursu keçsinlər, ali təhsil diplomu alsınlar və heç vaxt öz diplomlarına uyğun olaraq işlə təmin oluna bilməsinlər. Bu isə təbii ki, dövlətin məsuliyyətidir", - deyə Baş nazir vurğulayıb.

Təhlilə əsasən, aşağıdakı ixtisaslar da kəsirli (çatışmayan) peşələr hesab olunur:

Mühəndis-texniki istiqamət

Kimya texnologiyası və metallurgiya

Energetika

Nəqliyyat istiqamətləri

Mamalıq işi

Sosial iş

Kəsirli və bol peşələrdən başqa, İrakli Kobaxidzenin sözlərinə görə, tədqiqat biznesin idarə edilməsi (biznes inzibatçılığı) istiqamətində ixtisaslaşma (kvalifikasiya) məsələsinin problemli olduğunu da göstərib.

Universitetlərə nə qədər tələbə qəbul olmalıdır?
Bu məlumatlara əsasən, hər il universitetlərə təxminən 14 400 tələbə qəbul olmalıdır.
"Yekun olaraq təxminən 21 300 tələbə üçün qəbul elan ediləcək, müvafiq olaraq biz əmək bazarının təhlilinin bizə verdiyi optimal göstəricini 50% üstələyirik. Lakin tədricən, əlbəttə ki, əmək bazarının tələbləri ilə tələbələrin qəbul göstəriciləri arasında tam yaxınlaşmanı təmin etməliyik", - deyə İrakli Kobaxidze təqdimat zamanı bildirib.

Peşə təhsilinin inkişafı
Kobaxidzenin sözlərinə görə, tədqiqat göstərib ki, bu gün işləyənlərin yalnız 60%-nin öz iş yerində diploma ehtiyacı var. "İslahatımızın əsas məqsədlərindən biri ölkədə peşə təhsilinin təkmilləşdirilməsi və müvafiq keyfiyyətin yüksəldilməsidir."

"Gürcü Arzusu" hökuməti "Ali təhsil islahatı" çərçivəsində dövlət universitetlərinin tədris proqramlarını həyata keçirmək hüququnun məhdudlaşdırılması barədə qərarı təqdim edib. Kvotalar əmək bazarının təhlilinə əsaslanıb.

Təhsil naziri Qivi Mikanadzenin daha əvvəl verdiyi bəyanata görə, "dövlət universitetlərində kvotalar ali təhsil islahatı konsepsiyası ilə müəyyən edilmiş 'bir şəhər, bir fakültə' prinsipinə uyğun olaraq, universitetlərin ənənəvi profili nəzərə alınmaqla bölüşdürüləcək".
Mikanadzenin sözlərinə görə, dövlət universitetlərinə tələbə qəbulu kvotalarına hər il yenidən baxılacaq.

 

Mənbə: radiotavisupleba.ge

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---