"Gürcü Arzusu"nun keçmiş lideri və keçmiş Baş naziri, hazırda korrupsiya ittihamı ilə həbsdə olan İrakli Qaribaşvili məktub yayıb. Bu dəfə o, keçmiş komanda yoldaşı Mamuka Mdinaradze haqqında danışaraq bildirir ki, Mdinaradze ona yeni cinayətin etiraf edilməsi ilə bağlı məktub göndərib.

Qaribaşvilinin "həqiqəti"

İrakli Qaribaşvili bəyan edir ki, komandası və əziz insanları ilə "qarşıdurmanın" qarşısını almaq üçün "əlindən gələni edib". O, korrupsiya ilə bağlı ona irəli sürülmüş ittihamı etiraf etməsini və nəticədə prosessual razılaşma ilə 5 illik həbs cəzası almasını məhz bununla izah edib:

"Məhz bu məqsədlə mən hüquqi mübarizədən imtina etdim və dövlətin, eləcə də komandanın maraqlarına zərər vurmamaq üçün mənim üçün sarsıdıcı olan bu prosesi sonadək qəbul etdim".

Qaribaşvili 2026-cı il yanvarın 12-dən etibarən 5 illik həbs cəzasını çəkir – o, qanunsuz gəlirlərin leqallaşdırılmasında (çirkli pulların yuyulmasında) təqsirli bilinib və onunla prosessual razılaşma bağlanıb: həbs cəzasından əlavə, ona 1 milyon lari cərimə, iki avtomobilin müsadirəsi və 6.5 milyon ABŞ dolları məbləğində vəsaitin müsadirə olunması cəzası kəsilib.

"Sınaq"

Keçmiş Baş nazir bildirir ki, bunun müqabilində "qurulmuş çirkli təxribat" alıb: "İctimaiyyət bütün bu müddət ərzində məndən bir kəlmə də olsun eşitməyib. Mən bu sınağı tam təmkinlə qəbul etdim".

Məktub

"Gürcü Arzusu"nun keçmiş lideri və sədri dünən, avqustun 17-də dərc etdiyi məktubda bildirirdi ki, "Bidzina İvanişvilinin tapşırığı ilə" ona bir məktub göndərilib və ona məlum olmayan korrupsiya cinayətini "etiraf etmək" təklif olunub. Bu gün isə o, həmin məktubu göndərən şəxs kimi keçmiş komanda yoldaşının adını çəkib:

"Mənim üçün gözlənilmədən, iyul ayında dünən yaydığım məktubu aldım. Həmin məktubu mənə Mamuka Mdinaradze göndərmişdi".

Siyasətə gəlməyin 1%-lik riski

Qaribaşvilinin sözlərinə görə, o, Mdinaradzeyə cavab olaraq siyasətə qayıtmaq niyyətində olmadığını bildirib və "sözügedən 'riskin' sığortalanması məqsədilə öz baxışımı təklif etdim":

"Onlar cavab olaraq bildirdilər ki, mənim siyasətə qayıtmağımın hələ də 1%-lik riski qalır və buna görə də mənə korrupsiya ittihamının irəli sürülməsi və mənim bunu etiraf etməyim mütləq idi".

"Qırmızı xətt"

Həbsdə olan keçmiş Baş nazir bildirir ki, yeni korrupsiya ittihamını etiraf etmək tələbi onun üçün "qırmızı xətt" olub:

"...Bu da məni həyatımdakı en çətin addımı atmağa məcbur etdi. Müvafiq olaraq, başqa çıxış yolum qalmadığı üçün məni mübarizəyə başlamağa məcbur edirlər...".

Avqustun 17-də dərc olunmuş məktubun əsas mesajları

Keçmiş Baş nazir, hazırda həbsdə olan İrakli Qaribaşvili "Facebook"da yazıb ki, "bu gündən etibarən onun və ailəsinin təhlükəsizliyinə görə tam məsuliyyət Bidzina İvanişvili və bütün hakimiyyətin üzərinə düşür".

Qaribaşvili iddia edir ki, "Gürcü Arzusu"nun fəxri sədri Bidzina İvanişvilinin tapşırığı ilə ona məktub göndərilib və mənşəyi məlum olmayan korrupsiya işi üzrə etirafedici ifadə vermək təklif olunub.

"Azadlığa çıxdıqdan sonra siyasətə yaxınlaşmamalısan", – Qaribaşvilinin bəyanatına əlavə edilmiş məktubun fotosunda yazılıb. Məktubda qeyd olunanlara əsasən, etiraf edəcəyi təqdirdə ona kəsilmiş 5 illik həbs müddəti artırılmayacaq.

Qaribaşvili təklif olunan şərti onun və ailəsinin "məhv edilməsi üzrə çirkli plan" kimi qiymətləndirir və ictimaiyyətə söz verib ki, bugün, avqustun 18-də insanlara "həqiqəti" təqdim edəcək.

İrakli Kobaxidzenin cavabı

İrakli Qaribaşvilini Baş nazir vəzifəsində əvəz edən İrakli Kobaxidze avqustun 17-də dərc olunan məktubla bağlı deyib: "Mən bu bəyanatı gördüm, söhbətin nədən gitdiyini bilmirəm. Bildiyim bir şey var ki, konkret hökm çıxarılıb, qalanı isə tamamilə hüquq-mühafizə orqanlarının işidir".

İrakli Kobaxidze İrakli Qaribaşvilinin hansı məktubdan bəhs etdiyini bilmədiyini bildirib. O, həmçinin qeyd edib ki, keçmiş Baş nazir tərəfindən yayılan məktubla bağlı Bidzina İvanişvili ilə danışmayıb.

Mənbə: radiotavisupleba.ge

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---