Azərbaycan Xarici İşlər Nazirliyi Gürcüstan Patriarxlığının yaydığı bəyanata münasibət bildirib. Azərbaycan tərəfi iki ölkə arasında mövcud olan strateji tərəfdaşlıq və dostluq münasibətlərinin möhkəm təməllərə söykəndiyini vurğulayıb. Xarici İşlər Nazirliyinin məlumatına görə, mədəni və dini irslə bağlı istənilən məsələ diplomatik kanallar və ikitərəfli komissiyalar çərçivəsində konstruktiv müstəvidə müzakirə olunur. Bakı bildirir ki, Azərbaycan bütün dini və tarixi abidələrə hörmətlə yanaşır və Gürcüstanla tərəfdaşlığı bütün istiqamətlərdə dərinləşdirməyə hazırdır.

25 sentyabr 2026 15:21

"Gürcüstan Patriarxlığının Azərbaycanın ərazisində yerləşən Kürmük məbədi ilə bağlı verdiyi son açıqlama Azərbaycan ilə Gürcüstan arasında mövcud olan dostluq, tərəfdaşlıq və mehriban qonşuluq münasibətlərinin ruhuna ziddir.

Azərbaycan ərazisində yerləşən coğrafi və tarixi toponimlərin digər adlarla təqdim edilməsi qəbuledilməzdir.

Azərbaycan hər zaman Gürcüstanın ərazi bütövlüyünə və suverenliyinə hörmətlə yanaşıb. Eyni zamanda, Gürcüstan tərəfinin də Azərbaycanın ərazi bütövlüyünə və suverenliyinə eyni münasibət sərgiləməsi iki ölkə arasında formalaşmış strateji tərəfdaşlıq münasibətlərinin mühüm əsasını təşkil edir.

Məhz bu baxımdan, Gürcüstan Patriarxlığının Azərbaycanın ərazi bütövlüyünə və suverenliyinə münasibətdə ərazi iddialarını ehtiva edən yanaşması anlaşılan deyil.

Dini qurumların Azərbaycan və Gürcüstan xalqları arasında əsrlər boyu formalaşmış tarixi dostluq və mehriban qonşuluq münasibətlərinə xələl gətirə biləcək yanaşmalardan çəkinməsi vacibdir.

Bununla əlaqədar, Gürcüstan Patriarxlığı tərəfindən Ermənistan kilsəsinin məlum yanaşmalarının təkrarlanması və onun yolu ilə gedilməsi məsləhət görülmür.

Azərbaycan ərazisində mövcud olan bütün tarixi, mədəni və dini abidələr Azərbaycan xalqının və Azərbaycan dövlətinin milli irsinin ayrılmaz tərkib hissəsidir."


24.09.2026

Patriarxlıq Azərbaycanın ərazisində, “tarixi Hereti”də yerləşən Müqəddəs Qiorqi adına Kürmük məbədində və onun ərazisində aparılan işlərlə bağlı narahatlığını bildirib və müvafiq xidmətlərin cəlb olunmasını tələb edib. Onların sözlərinə görə, XV əsrə aid tarixi abidədə aparılan işlər barədə onlara məlumat verilməyib.

“Bu, iki qonşu dövlət və xalqlar arasında mehriban qonşuluq münasibətlərinə və əməkdaşlığın möhkəmləndirilməsi prosesinə mənfi təsir göstərir...
Həm işlərin qeyri-müəyyən məqsədlərindən, həm də Gürcüstanın mədəni irs abidəsinin gürcü tərəfi ilə razılaşdırılmadan bərpa edilməsindən irəli gələn çoxsaylı suallar yaranır”, – Patriarxlığın açıqlamasında deyilir.

Açıqlamada bildirilib ki, aşağıdakılar müəyyənləşdirilməlidir:

məbədin ərazisində hansı işlərin aparıldığı;
işlərin hansı tədqiqatlara əsaslandığı və bu tədqiqatları kimin apardığı;
gürcü mədəni irs abidəsinin mühafizəsinin necə təmin edildiyi.

“Aşağıdakı prosesə Gürcüstan dövlətinin müvafiq qurumlarının təcili şəkildə cəlb olunmasının və onların səlahiyyətləri, eləcə də mövcud beynəlxalq əməkdaşlıq formatı çərçivəsində lazımi reaksiya verilməsinin zəruri olduğunu hesab edirik. Sözügedən qurumların məsələ ilə maraqlanması, rəsmi məlumat əldə etməsi və Gürcüstan Patriarxlığının nümayəndələrinin, eləcə də sahə üzrə gürcü mütəxəssislərin məsələnin müzakirəsinə cəlb olunmasına kömək etməsi vacibdir”, – açıqlamada qeyd olunur.

Patriarxlığın Facebook səhifəsində yayımlanan fotolarda Müqəddəs Qiorqi adına Kürmük məbədinin daxili və xarici ərazilərinin qazıldığı və əraziyə xüsusi, “işarələyici lent” çəkildiyi görünür.


Azərbaycanda, Müqəddəs Qiorqi adına Kürmük məbədində zəvvarlar adətən Qiorqoba bayramını qeyd edirlər. Ötən illərdə Dini Qurumlarla İş üzrə Dövlət Agentliyinin rəhbəri bir neçə dəfə oraya səfər edib, din xadimləri isə ibadət mərasimləri keçiriblər.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---